Jo Bayden ma’muriyati 500 million dozada Pfizer / BioNTech koronavirusga qarshi ikki komponentli vaksinasini sotib olib, bir yil davomida kam va o‘rta daromadli 92 davlatga yuboradi. Bu haqda Oq uy veb-saytiga tayanib Meduza xabar berdi.

Foto: Reuters

Jo Bayden rivojlanayotgan mamlakatlarga vaksina yuborish haqida 10-iyun kuni o‘zining Yevropaga safari davomida e’lon qildi.

Qayd etilishicha, vaksinalar avgust oyidan yetkazib berilishni boshlaydi, 2021-yil oxiriga qadar 200 million, 2022-yil iyungacha yana 300 million dozani yuborish rejalashtirilgan.

Vaksinalar Jahon sog‘liqni saqlash tashkiloti (JSST) qoshida tashkil etilgan COVAX dasturi orqali yetkazib beriladi. Ma’lumot uchun, COVAX dasturida 170 mamlakat ishtirok etadi. Dastur doirasida o‘rta va yuqori daromadli mamlakatlar vaksina sotib olishga qurbi yetmaydigan 92 ta davlat uchun zarur dori vositalari pulini to‘lab beradi. Vaksinani qabul qiluvchi mamlakatlardan faqat qisman to‘lov (15 foiz) talab qilinadi.

“AQSh rasmiylari Pfizer bilan vaksinalarni oshkor qilinmagan ‘notijoriy’ narxda sotib olishga kelishib oldi”, — deya xabar bermoqda The New York Times va The Washington Post o‘z manbalariga tayanib.

Avvalroq AQSh hukumati Pfizer bilan 300 million dozada vaksinani mamlakat ichida tarqatish uchun sotib olish to‘g‘risida shartnoma imzolagan edi. NYT ta’kidlashicha, qayd etilgan 500 million doza vaksina unga qo‘shimcha ravishda sotib olinadi.

The New York Times gazetasining yozishicha, AQSh va’da qilgan 500 million doza vaksina dunyo aholisini emlash uchun zarur bo‘lgan 11 milliard dozadan ancha kam. Afrikaning bir qator mamlakatlarida aholining 1 foizdan kamrog‘i, AQSh va Buyuk Britaniyada esa aholining, taxminan, yarmi emlangan, deya qayd etadi gazeta.

Bloomberg ma’lumotlariga ko‘ra, dunyoning 178 mamlakatida 2,23 milliarddan ortiq dozadagi vaksinalar qo‘llanilgan — bu dunyo aholisining 14,5 foizini to‘liq emlash uchun yetarli.