Ijtimoiy tarmoqda “Prezident tashrifi vaqtida ko‘cha supurayotgan ayolni hokimlik mashinasi urib ketdi. Ayol ikki kundan buyon komada” sarlavhasi ostidagi xabar tarqaldi. YHXBB bu xabarlarni rad etdi.

Xabarda aytilishicha, 1-iyun kuni soat 07:30 larda haydovchi E.B. Captiva’ni Termiz shahri, “Shodlik” mahallasidagi Amir Temur ko‘chasi bo‘ylab boshqarib kelib, ko‘chaning “Barkamol avlod” markaziy ko‘chasi bilan kesishgan chorrahasidan o‘tayotganida unga nisbatan chap tomondan o‘ng tomonga qarab piyodalar yo‘lakchasidan velosipedda ketayotgan P.R.ni urib yuborgan.

Oqibatda velosipedchi Respublika shoshilinch tibbiy yordam ilmiy markazining Termiz filialidagi jonlantirish bo‘limiga yotqizilgan.

Surishtiruv davomida mazkur transport vositasi davlat rahbarining Surxondaryo viloyatiga tashrifi jarayonida tashkil etilgan kortej avtomobillariga aloqasi yo‘qligi, bundan tashqari Amir Temur va Barkamol avlod ko‘chalarining kesishmasida kortej harakatlanmagani aniqlangan.

Ayni paytda YTH yuzasidan Termiz shahar IIO FMB huzuridagi Tergov bo‘limi tomonidan tekshiruv harakatlari olib borilmoqda.

YHXBB axborotida haydovchi E.B. boshqaruvidagi Captiva jismoniy shaxsga tegishlimi yoki biror tashkilotga biriktirilganmi — bunga aniqlik kiritilmagan.

Eslatib o‘tamiz, Shavkat Mirziyoyev hududlar iqtisodiyoti, aholi turmush sharoitlari bilan yaqindan tanishish maqsadida 1—2-iyun kunlari Surxondaryo viloyatida bo‘lgan edi.