Ohangaronda bir-biri bilan to‘qnashgan “KamAZ” va Lacetti to‘liq yonib ketdi

10-may kuni soat 21:30 larda Toshkent viloyati Ohangaron tumani “Ubayda” MFY hududidagi chorrahada yuk avtomobili va Lacetti ishtirokida yo‘l-transport hodisasi sodir bo‘ldi, deb xabar beradi IIV YHXBB axborot xizmati.

Ma’lum qilinishicha, 21 yoshli O.T. boshqaruvidagi MAN, 23 yoshli X.Yu. boshqaruvidagi Lacetti hamda 22 yoshli M.T. boshqaruvida bo‘lgan “KamAZ” mashinalari ishtirokida to‘qnashuv sodir bo‘lgan. To‘qnashuv oqibatida yong‘in yuzaga kelgan.

FVV matbuot xizmatining yozishicha, hodisa joyiga Ohangaron tuman FVBning 4 ta yong‘in-qutqaruv guruhlari 21:56 da yetib borgan. Yong‘in 21:58 da qurshab olinib, 22:08 da to‘liq bartaraf etilgan. Transport vositalariga jiddiy zarar yetgan.

MAN va Lacetti haydovchilari turli tan jarohatlari bilan shifoxonaga yetkazilgan. Mazkur holat yuzasidan Ohangaron tuman IIB Tergov bo‘limi tomonidan dastlabki surishtiruv harakatlari olib borilmoqda.

Avvalroq Toshkentda Howo yuk mashinasi ag‘darilib, yonib ketgani to‘g‘risida xabar berilgandi. Mavzuga doir: 

• Toshkentdagi “O‘rikzor” bozori yaqinida “Zaporojets” yonib ketdi
• Andijonda “Gazel” va Lacetti to‘qnashuvi oqibatida yong‘in yuzaga keldi va ikkala avtomobil saloni yonib ketdi (foto)