Dubaydan 50 km uzoqlikda Sevgi ko‘li joylashgan. Al-Qudra cho‘li o‘rtasidagi mazkur ko‘lning ko‘rinishi tutashgan ikki yurak shaklini esga soladi.
Dubayda diqqatga sazovor joylar bisyor: palma shaklidagi orol, mashhur Burj Xalifa va yelkan shaklidagi hashamatli Burj Al Arab mehmonxonasi. Ammo paydo bo‘lganiga bir necha yil bo‘lishiga qaramay, Sevgi ko‘li tashrif buyuruvchilarning e’tiboridan chetda qoladi.
Sevgi ko‘li 2018-yilda cho‘lning qoq o‘rtasida paydo bo‘lgan.
Ko‘l bir-biri bilan tutashgan ikki yurak shaklini esga soladi.
Yuraklarning chetlari suv bilan to‘ldirilgan, markazda esa orolchalar qoldirilgan. Uning atrofida yo‘lak va daraxtlar borligini ko‘rish mumkin.
Ushbu go‘zallikdan bahra olish uchun yuqoriga ko‘tarilish kerak.
Chunki pastdan qaralganda oddiy hovuz va butalardan iborat manzara ko‘rinadi, xolos.
Aslida, cho‘l o‘rtasida suvni ko‘rish ham kishini hayratga solishiga shubha yo‘q.
Bu yerda 16 mingta daraxt va buta, bundan tashqari, minglab o‘simliklarni uchratish mumkin.
Yuraklar yo‘nalishi bo‘ylab ekilgan o‘simliklar yuqoridan qaraganda ko‘rinmaydi.
Mazkur vohadagi gulzor, hovuz va hatto o‘yin maydoni ham yurak shaklida.
