Buxoroda Laсetti haydovchisining uxlab qolishi oqibatida YTH sodir bo‘ldi

Buxoro—Xorazm yo‘nalishida noqonuniy yo‘lovchi tashish bilan shug‘ullanib kelgan taksi haydovchisining uxlab qolishi oqibatida yo‘l transport hodisasi sodir bo‘ldi. Bu haqda “Daryo”ga viloyat IIB YHXB matbuot xizmati rahbari Ulug‘bek Shukrullayev ma’lum qildi.

Ta’kidlanishicha, Buxoro viloyatining Gazli cho‘l hududidan o‘tuvchi A-380 G‘uzor—Buxoro—Nukus—Beyneu xalqaro ahamiyatga ega avtomobil yo‘lining 284-kilometrida fuqaro J.T. o‘ziga tegishli Lacetti’da uxlab qolishi oqibatida qarama-qarshi tomondan harakatlanib kelayotgan Shacman yuk avtomashinasi bilan to‘qnashgan. Oqibatda haydovchi og‘ir tan jarohati olib, Respublika shoshilinch tibbiy yordam ilmiy markazining Buxoro filialiga keltirilgan.

Bildirilishicha, Lacetti’da haydovchidan tashqari yana to‘rt nafar yo‘lovchi ham bo‘lgan. Haydovchi J.T. noqonuniy yo‘lovchi tashish faoliyati bilan shug‘ullanib kelgani ma’lum bo‘lgan.

“Xalqaro ahamiyatga ega avtomobil yo‘lining 315-kilometrdan 440-kilometrgacha bo‘lgan masofada yo‘naltiruvchi ustunchalarning har biriga nur qaytaruvchi vositalar, avtopatrul maketlari va ko‘k, qizil rangda yonib o‘chuvchi mayoqchalar o‘rnatilgan. Bu haydovchilarga harakatlanish davomida hushyorlikni oshirishga xizmat qiladi. Lacetti haydovchisi esa charchoq hamda pisixofiziologik holatda bo‘lgan. Ayni paytda dastlabki tergov harakatlari olib borilmoqda”, — deydi Ulug‘bek Shukrullayev.

Eslatib o‘tamiz, avvalroq Surxondaryo viloyatining Sherobod tumanida Nexia-2 beton to‘siqqa urilishi oqibatida yo‘lovchi vafot etgandi, Namanganda esa Damas urib yuborgan 8 yoshli bola halok bo‘lgandi.