Surxondaryo viloyati Sherobod tumanida Nexia-2 beton to‘siqqa urilishi oqibatida yo‘lovchi vafot etdi. Bu haqda viloyat Yo‘l harakati xavfsizligi boshqarmasi matbuot xizmati xabar berdi.
Foto: Surxondaryo viloyati YHXB
Voqea 24-aprel kuni, taxminan, soat 10:30 da M-39 avtomobil yo‘lining 1412-kilometrida yuz bergan. Ushbu avtomobil yo‘lida ta’mirlash ishlari olib borilayotgani sababli bir taraflama harakat yo‘lga qo‘yilgan bo‘lgan. Yo‘lda tartibga soluvchi belgilar o‘rnatilgan bo‘lib, beton to‘siq bilan ajratilgan.
Ishonchnoma orqali boshqarish huquqiga ega bo‘lgan 31 yoshli haydovchi Nexia-2’ni boshqarib ketayotib, yo‘l chetidagi beton to‘siqqa borib urilgan. Mashinaning zarb bilan urilishi oqibatida beton to‘siq 3—4 metr uzoqlikka surilib, ag‘darilib ketgan.
Nexia-2’ning oldingi o‘rindig‘ida yo‘lovchi sifatida ketayotgan haydovchining otasi hayot uchun xavfli tan jarohati olib, tuman tez tibbiy yordam shoshilinch mazkaziga yuborilgan. Ko‘rsatilgan muolajalarga qaramay, jonlantirish bo‘limida vafot etgan.
Avvalroq Surxondaryoda quvib o‘tish qoidasini buzib, uch kishining o‘limiga sabab bo‘lgan Nexia haydovchisiga sud hukmi o‘qilgani haqida xabar berilgan edi. Shuningdek, Surxondaryoda Cobalt va Spark to‘qnashuvi oqibatida 6 kishi halok bo‘lgani, haydovchilardan biri 8 yilga qamalgani ma’lum qilingandi.
