Din ishlari bo‘yicha qo‘mita raisi Sodiq Toshboyev hamda O‘zbekiston musulmonlari idorasi raisi, muftiy Usmonxon Alimov boshchiligida Qoraqalpog‘iston Respublikasi, viloyatlar va Toshkent shahar vakillari hamda tuman va shahar bosh imom-xatiblari ishtirokida videoselektor yig‘ilishi o‘tkazildi. Bu haqda qo‘mita matbuot xizmati xabar berdi.

Foto: “Daryo” / Rustamxon Temirov

Yig‘ilishda O‘zbekiston bosh vaziri boshchiligida o‘tkazilgan Maxsus komissiyaning navbatdagi yig‘ilishida ko‘tarilgan masalalar va belgilangan vazifalar kun tartibidan joy olgan.

Videomuloqotda so‘nggi kunlarda epidemiologik vaziyat yomonlashgani, shu bois, diniy soha xodimlari, imom-xatiblardan mas’uliyatni yanada oshirish, masjidlarda o‘tkazilayotgan tarovih, xatmi Qur’on ibodatlarida karantin qoidalariga to‘liq amal qilish lozimligi ta’kidlangan.

Videomuloqotda Din ishlari bo‘yicha qo‘mita raisi Sodiq Toshboyev muborak Ramazon oyida tarovih namozlarini ochiq hududlarda (ochiq ayvonlar, masjid hovlisi, masjidga tutash ichki ko‘chalar) ado etish, sanitariya qoidalari va karantin talablariga to‘liq rioya etish hamda iftorliklarni imkon qadar oila davrasida yoki ishtirokchilar soni cheklangan holda, ixcham, ortiqcha dabdaba va isrofgarchiliksiz o‘tkazish, bu borada imom-xatiblar mas’uliyatini yanada oshirish borasidagi muhim ko‘rsatma va tavsiyalarni aytib o‘tgan.

Shuningdek, aholi salomatligini asrab-avaylash maqsadida juma va tarovih namozlarini amalga oshirishda 65 va undan katta yoshdagi fuqarolar, yosh bolalar hamda surunkali kasalligi mavjud shaxslar ibodatlarni uy sharoitida amalga oshirishlari bo‘yicha tushuntirish ishlarini olib borish, har bir namozxon masjid ichida va namoz davomida tibbiy niqob taqqan holda bo‘lishi va masjidga kirishda dezinfeksiya vositasidan foydalanishi, bino xonalarini har kunlik dezinfeksiya qilish, kirish-chiqish joylarini pirometrlar (kontaktsiz harorat o‘lchagich), antiseptik vositalar bilan jihozlash kabi muhim jihatlar ham alohida qayd etilgan.

O‘z navbatida, murakkab epidemiologik vaziyatni e’tiborga olib, O‘zbekistonda faoliyat yuritayotgan boshqa diniy konfessiyalarga mansub diniy tashkilotlar ham jamoaviy ibodatlarni yuqoridagi tavsiyalar asosida amalga oshirish choralarini ko‘rishlari alohida ta’kidlangan.

Avvalroq Abdulla Aripov boshchiligida koronavirusga qarshi kurash komissiyasining kengaytirilgan yig‘ilishida O‘zbekistonga koronavirusning “afrikacha” shtammi kirib kelgani, 18-apreldan karantin talablari kuchaytirilishi, qoidabuzarlar qat’iy javobgarlikka tortilishi to‘g‘risida xabar berilgandi.