17-aprel kuni bosh vazir Abdulla Aripov boshchiligida koronavirusga qarshi kurash komissiyasining kengaytirilgan yig‘ilishi bo‘lib o‘tmoqda. Bu haqda “Daryo” muxbiri Musulmonbek Ibrohimov xabar berdi.

Foto: “Daryo” / Madina Nurman

Yig‘ilishda butun dunyo bo‘ylab koronavirusga chalinganlar soni ortayotgani ta’kidlangan.

“16-aprel holatiga ko‘ra, dunyo bo‘ylab koronavirusga chalinganlar soni 119 million kishidan oshdi. Ularning 3 millionga yaqini vafot etgan. Dunyo bo‘yicha o‘tgan bir sutka ichida 837 ming kishida kasallanish holati qayd etilgan, 14 mingga yaqin bemor vafot etgan. Bu pandemiya boshlanganidan buyon qayd etilgan eng yuqori sutkalik ko‘rsatkich hisoblanadi.

Qozog‘istonda ham kunlik kasallanish 2,8 ming kishidan oshgan — ularda ham ko‘rsatkich bunga chiqmagan edi. Qirg‘izistondan esa 3 mingdan oshib ketdi.

O‘zbekistonda oxirgi sutkada koronavirusga chalinganlar soni 300 kishidan oshgani sabab komissiya favqulodda yig‘ilish o‘tkazishga qaror qilindi”, — deydi Abdulla Aripov.

Bosh vazirning ta’kidlanishicha, Prezident Shavkat Mirziyoyev ham hozirgi pandemiya holatidan bezovta bo‘lib, Respublika maxsus komissiyasiga e’tiroz bildirgan, joylarda karantin tadbirlarini tashkil etishda tegishli choralar ko‘rilmayotganini ta’kidlagan.

Eslatib o‘tamiz, aprel boshida Shavkat Mirziyoyev mamlakat qattiq karantinga qaytmasligini ma’lum qilib, “hech qayerni yopilmasligi, lekin tartib-intizomni kuchaytirilishini” ta’kidlagan edi.