Bugun,

  • USD 10940.05
  • RUB 182.26
  • EUR 11121.65

O‘zbekiston musulmonlari idorasi og‘iz ochish uchun nima sababdan xurmo iste’mol qilinishi haqida ma’lumot berdi.

Qayd etilishicha, ochlikning so‘nggi soatlarida qonda qand miqdori ko‘tariladi. Natijada holsizlik, dangasalik, diqqatni jamlay olmaslik kabi holatlar avj oladi. Xurmo esa qondagi qand miqdorini pasaytiradi. Og‘iz ochish paytida qorin ochqab, badan ko‘p taom istab turgan holatda xurmo birinchi bo‘lib oshqozonga yetib borsa, miyaga to‘qlik hissini jo‘natadi. Natijada holsizlanib turgan oshqozonga yengil va tez hazm bo‘luvchi meva joylashadi.

Shoh Valiyulloh Dehlaviy “Hujjatullohil balig‘o” kitobining “Ro‘za hukmlari” bobida quyidagi hadisni keltirgan:

“Payg‘ambarimiz salollohu alayhi vasallam aytdilar: “Agar sizlardan birortangiz og‘iz ochadigan bo‘lsa, xurmo bilan og‘iz ochsin. Albatta, u barakadir. Agar uni topa olmasa, suv bilan iftorlik qilsin. Chunki u poklovchidir”. (Ahmad Dorimiy rivoyati).

Aytamanki, insonning tabiati shirinlikni yoqtiradi, ayniqsa, ochlikdan so‘ng. Jigar ham shirinlikni xushlaydi. Arablarning ham tabiati xurmoga moyil. Xurmo munosib vaqtda tanovul qilingani uchun baraka olib keladi”.

O‘zbekiston musulmonlari idorasi xabarida ta’kidlanishicha, xurmo tarkibida vitamin A, B-1, 2, 3, 5, 6, 9, C, D, K, kalsiy, temir, fosfor, ruh, natriy va marganets singari kompleks elementlar bor. Ushbu foydali elementlar va vitaminlar sabab saraton kasalligini bartaraf etadi. Xurmodagi kaliy miqdorining yuqoriligi sababli asab tizimi o‘ziga keladi.

Bundan tashqari, xurmo cheksiz quvvat manbai bo‘lib, kun davomidagi charchoqni chiqaradi. O‘pka ishlashini, jigar faoliyatini yaxshilaydi, yurak faoliyatini rivojlantiradi, anemiya va gipertoniyada juda foydali, immunitetni ko‘taradi. O‘zi shira, glyukoza va saxarozaga boy bo‘lsa-da, qand miqdorini ko‘tarmaydi. Aksincha tushiradi. Bir kunda to‘rt donadan iste’mol qilish tavsiya qilinadi. Ortiqchasi ko‘plik qiladi.

Xurmoning 1 donasi, taxminan, 23 kaloriyaga ega bo‘lib, ozishni istaganlar shirinlik sifatida tanovul qilsa bo‘ladi. Homilador va emizikli ayollarga eng yaxshi ozuqa manbai hisoblanadi, shuningdek, stress va taranglikni kamaytiradi.

“Shu va shunga o‘xshash foydali jihatlarni o‘zida mujassam etgan xurmo mevasi yosh-u qariga birday mos keladi. Faqat uni ham me’yorida iste’mol qilish zarur”, — deya qayd etgan O‘zbekiston musulmonlari idorasi.

Eslatib o‘tamiz, Saudiya Arabistoni Ramazon oyi munosabati bilan O‘zbekistonga 50 tonna xurmo sovg‘a qildi. “Vaqf” xayriya jamoat fondi matbuot xizmati ushbu xurmolar respublika bo‘ylab muhtojlarga beg‘araz xayriya qilinayotganini ma’lum qildi.

Izoh
Asosiy yangiliklar
Dunyo
Putin oktabr o‘rtalarida Ostonaga tashrif buyurishi mumkin
Dunyo
Qirg‘iziston ta’lim vaziri xorijlik talabalardan pora olayotgan vaqtda ushlandi
Mahalliy
O‘zbekistonda 30-sentabrda qanday ob-havo kutilmoqda?