Toshkentda IIBB xodimlari ayollarni kuch ishlatib, xizmat mashinasiga o‘tqizayotgani aks etgan video bo‘yicha rasmiy izoh berildi

Toshkent shahar IIBB xodimlari ayollarni xizmat avtomobili tomon olib ketayotgani aks etgan videotasvir ijtimoiy tarmoqlarda tarqaldi. Poytaxt IIBB matbuot xizmati bunga izoh berdi.

Ma’lum qilinishicha, 14-aprel kuni, taxminan, soat 21:30 da Qoratosh va Bunyodkor ko‘chalari kesishmasida Toshkent shahar IIBB patrul-post xizmati xodimlari avtomobillar qatnov qismida farzandlari bilan tilanchilik qilib, haydovchilarga xalaqit berayotgan uch nafar ayolni ko‘rgan.

Ayollar tilanchilik qilish ma’muriy huquqbuzarlik hisoblanishi haqida ogohlantirilib, ularning shaxslarini aniqlash maqsadida Shayxontohur tumani IIO FMB 2-sonli ichki ishlar bo‘limiga taklif qilingan. Bunga javoban ayollar atrofdagilarning rahmini keltirish uchun baqirib, xodimlarga faol qarshilik qila boshlgan.

Ichki ishlar bo‘limiga olib kelingan ayollar samarqandlik, ikki farzandli 25 yoshli M.Yu., 30 yoshli Z.Sh. va 25 yoshli S.U. ekanligi, ular muqaddam bir necha marotaba ogohlantirilgani aniqlangan.

“Bundan avval xodimlar mazkur ayollarni yo‘l qismida tilanchilik maqsadida bolalaridan foydalanayotganliklarining guvohi bo‘lgan. Bu ayollarning yo‘l qatnov qismida tilanchilik qilishi nafaqat ularning o‘zlari, balki norasida go‘daklarining hayoti uchun ham xavfli bo‘lib, kamiga, boshqa yo‘l harakati qatnashchilarining hayotini ham xavf ostida qoldirgan.

Ayollarga nisbatan tegishli hujjatlar rasmiylashtirilib, qonuniy chora ko‘rilishi uchun tergovga qadar tekshiruv o‘tkazilmoqda, natijasi haqida qo‘shimcha xabar beriladi”, — deyiladi IIBB xabarida.

Mart oyida senatorlar so‘nggi paytlarda aholi harakati gavjum bo‘lgan ko‘chalar, xiyobonlar, bozorlar va ularga tutash hududlardagi avtotransport vositalarini vaqtincha saqlash joylari hamda chorrahalarda tilanchilik qilib kelayotgan shaxslar ko‘plab uchrayotganini qayd etgandi. Qonunchilikda tilanchilik uchun ma’muriy va jinoiy javobgarlik masalasi belgilangan bo‘lsa-da, ushbu normaning hayotda qat’iy ishlamayotgani bunday shaxslarning kundan kun ko‘payib borishiga sabab bo‘lishi ta’kidlangan.

Eslatib o‘tamiz, 2019-yilning yanvarida Shavkat Mirziyoyev tilanchilik uchun ma’muriy va jinoiy javobgarlikni joriy etishni ko‘zda tutuvchi qonunni imzolagandi. Qonunga muvofiq, jamoat joylarida pul, oziq-ovqat mahsulotlari va boshqa moddiy qimmatliklar berishni faol tarzda so‘rab, tilanchilik bilan shug‘ullanish ma’muriy jazo sabab bo‘ladi, ma’muriy jazo qo‘llanilganidan keyin sodir etilgan bo‘lsa, 240 soatgacha majburiy jamoat ishlari yoki 2 yilgacha axloq tuzatish ishlari yoxud bir yilgacha ozodlikni cheklash yoki bir yilgacha ozodlikdan mahrum qilish bilan jazolanadi.