Bosh prokuratura bloger Otabek Sattoriyga nisbatan qo‘zg‘atilgan jinoyat ishi bo‘yicha Surxondaryo viloyati IIB huzuridagi Tergov boshqarmasi tomonidan qonun buzilishi holatlariga yo‘l qo‘yilganligi aniqlanmaganini ma’lum qildi. Shuningdek, tergov ustidan Bosh prokuratura tomonidan nazorat o‘rnatilgani bildirildi.

Foto: Otabek Sattoriy / Facebook

Termiz shahar sudi ajrimi bilan 1-fevral kuni Otabek Sattoriyga nisbatan qamoqqa olish tarzidagi ehtiyot chorasi qo‘llanilgan.

“Bugungi kunda tergov organiga 7 ta holat bo‘yicha O.Sattoriyning xatti-harakatlari ustidan murojaatlar kelib tushgan bo‘lib, hozirda ushbu holatlarga tergov yo‘li bilan oydinlik kiritilmoqda”, — deyiladi Bosh prokuratura xabarida.

Qayd etilishicha, sud Sattoriyni Ma’muriy javobgarlik to‘g‘risidagi kodeksining 40-(tuhmat), 41-(haqorat qilish), 202-2-moddasi (yolg‘on axborot tarqatish) bilan aybli deb topgan va unga bazaviy hisoblash miqdorining 40 baravari miqdorida jarima jazosi tayinlagan.

Bunga uning 2021-yil yanvar oyida ijtimoiy tarmoqlarda “Denov ko‘mir ombori” hamda Termiz shahridagi hayvonot bog‘i xodimlari mulklarni o‘zlashtirish va boshqa noqonuniy harakatlar sodir etganliklari haqida haqorat va tuhmatlardan iborat yolg‘on axborot tarqatganligi sabab bo‘lgan.

Eslatib o‘tamiz, surxondaryolik bloger Otabek Sattoriy tovlamachilikda ayblanib, 29-yanvar kuni hibsga olingan edi. Deputat Rasul Kusherbayev blogerning qo‘lga olinishiga o‘z munosabatini bildirib, bu holatni “amaldorlarni tanqid qilayotgan bitta blogerga emas, butun boshli so‘z erkinligiga, Prezidentning ochiqlik siyosatiga qarshi surxondaryolik amaldorlarning isyonidir” deb ta’riflagandi.

Blogerning hibsga olinishi yuzasidan Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov ham munosabat bildirdi.

“Qonunni buzishga na jurnalist va na bloger haqli. Men bu haqda kecha o‘z fikrimni bildirdim. Lekin nima uchun eng xavfli jinoyatchidek uning uyida tintuv o‘tkazildi, nima uchun u ko‘plab odamlar bilan olib ketildi, nima uchun sud yopiq bo‘lyapti?

Barcha tovlamachilikda gumon qilingan fuqarolarga shunaqa munosabat qilinadimi? Yoki bloger bo‘lgani uchun shunday alohida ‘hurmat-ehtirommi’? Bu normal holatmi? Ichki ishlar vazirligi bu masala yuzasidan izoh berishi shart. Metodlar qachon o‘zgaradi? Bosib olib ketmay, idoraga qonuniy chaqiruv qog‘ozi bilan chaqirilsa, kelmas edimi? Ehtiyot chorasi sifatida nima uchun eng og‘iri, qamoq tanlandi?

Qonun hamma uchun barobar ekan, organ xodimlari ham oshirib yuborishmasin. Bizning jamoat fondimiz bunday xatti-harakatni keskin qoralaydi. Bosh prokuraturadan ushbu holatga huquqiy baho berishlarini so‘raymiz”, — degan u.

Keyinroq Oliy sud ushbu blogerga qo‘yilgan ayblov o‘zgartirilmagani va prokuraturaning blogerga nisbatan qamoqqa olish ehtiyot chorasi ko‘rilishi haqidagi iltimosnomasi qanoatlantirilgani ma’lum bo‘lgandi. Blogerning advokati Shavkat Shokirov “Gazeta.uz”ga bergan intervyusida u ishni uyushtirilgan deb hisoblashini aytgan.

“Agar tergov organi prokuratura bilan birgalikda o‘z yuzini yo‘qotishni istamasa, unda jinoyat alomatlari yo‘qligi to‘g‘risida bayonot bilan uni ozod qilishi kerak. Hozirda ular boshqa bir qonunbuzarlik faktini ‘yaratish’ bilan band deb qo‘rqaman… Hozir Otabek butun tizim unga qarshi ishlayapti, deb hisoblamoqda”, — degan advokat.