AQSh prezidenti Jo Bayden razvedka birlashmasiga rossiyalik muxolifatchi Aleksey Navalniyning zaharlanishi bo‘yicha vaziyatni o‘rganish va 2020-yilda Amerikadagi qator idoralarga amalga oshirilgan kiberhujumga “rus xakerlarining” aloqasini tekshirish bo‘yicha topshiriq berdi. Bu haqda Oq uy matbuot kotibi Jen Psakiga tayanib, “RBK” xabar qildi.
“Prezident Bayden razvedka birlashmasiga muxolifat yetakchisi Aleksey Navalniyga qarshi kimyoviy quroldan foydalanilgani bo‘yicha to‘liq tahlil o‘tkazish topshirig‘ini berdi”, — deydi Psaki.
Uning so‘zlariga ko‘ra, mamlakat rahbari, shuningdek, 2020-yilda AQSh federal idoralariga amalga oshirilgan keng ko‘lamli kiberhujumga Moskvaning ehtimoliy aloqasini tekshirish bo‘yicha ham ko‘rsatma bergan.
Bundan tashqari, milliy razvedka Rossiya maxsus xizmatlari Afg‘onistondagi amerikalik harbiylarni o‘ldirish uchun “Tolibon” harakati a’zolariga pul bergani to‘g‘risidagi xabarlarni ham tekshiradi.
The Washington Post’ning yozishicha, razvedkaning bu boradagi hisoboti “kelgusi hafta Rossiyaning tajovuzlariga qarshi beriladigan javobga asos” bo‘lib xizmat qiladi.
Mavzuga doir: Bayden Trampning iqlim bo‘yicha Parij bitimi va JSSTdan chiqish to‘g‘risidagi qarorlarini bekor qildi
Izoh (0)