Bir milliondan ortiq rossiyalik allaqachon “Sputnik V” koronavirusga qarshi emlashni qabul qilgan. Bu haqda 6-yanvar kuni ushbu vaksina ishlab chiqaruvchisi Twitter’da xabar berdi.
Over 1 million people in Russia🇷🇺 have now been vaccinated with Sputnik V.
— Sputnik V (@sputnikvaccine) January 6, 2021
Bir kun oldin Gamaleya Epidemiologiya Markazining direktori Aleksandr Gintsburg shunga o‘xshash taxminni aytgan. Unga ko‘ra, Yangi yil ta’tillari oxiriga qadar “Sputnik V”ning 1,5 milliondan ortiq dozasi fuqarolarga yetkaziladi.
Virusga qarshi kurash bo‘yicha federal hukumat shtabi Rossiyada emlash bo‘yicha aniq statistikani e’lon qilmaydi. Faqat Rossiya Sog‘liqni saqlash vazirligi rahbari Mixail Murashko emlangan ruslar soni to‘g‘risidagi ma’lumotlarni e’lon qildi. Unga ko‘ra, 2-yanvarga qadar 800 ming kishi koronavirusga qarshi emlangan.
Eslatib o‘tamiz, “Sputnik V” koronavirusga qarshi birinchi rus vaksinasi 11-avgustda ro‘yxatdan o‘tkazildi. Hozirgi vaqtda Rossiyada fuqarolarni emlash bilan parallel ravishda vaksinani o‘rganish davom etmoqda. “Interfaks” ma’lumotlariga ko‘ra, 50 dan ortiq mamlakatdan 1,2 milliarddan ortiq dozada Rossiya vaksinasini sotib olish uchun arizalar kelib tushgan. Xususan, 29-dekabr kuni Argentina o‘z aholisini koronavirusga qarshi “Sputnik V” vaksinasi bilan emlashni boshladi.
Biroq so‘rovlarga ko‘ra, rossiyaliklarning yarmidan ko‘pi koronavirusga qarshi “Sputnik V” vaksinasi bilan emlanishni xohlamaydi. Vengriya esa Rossiya vaksinasini sotib olmaslikka qaror qildi.
