Komil Allamjonov va Saida Mirziyoyeva 8 yildan buyon pansionatda yashayotgan faxriy jurnalist holidan xabar oldi

Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov va uning o‘rinbosari Saida Mirziyoyeva 8 yildan buyon Respublika urush va mehnat faxriylari pansionatida istiqomat qilayotgan O‘zbekistonning faxriy jurnalisti Rustam Obidov holidan xabar oldi. Bu haqda Komil Allamjonov o‘zining Telegram’dagi kanali orqali ma’lum qildi.

“Rustam Obidov allaqachon pensiyaga chiqqaniga qaramay, tarjimalar qilib, astoydil ishlashda davom etmoqda.

Afsuski, bu yil pandemiya tufayli bu halol, mehnatsevar va juda kamtar inson qiyin moliyaviy vaziyatga tushib qoldi. Shu sababli, ham pansionatda yashash xarajatlarining barchasini to‘lay olmagan.

Mass-media fondi va shaxsan men Rustam Obidovga uning muammolarini hal qilishda yordam berishni o‘z burchimiz deb hisoblaymiz. Faxriy jurnalistlar O‘zbekiston tarixidir. Ularning mehnati va fidokorona faoliyati tufayli biz mamlakatimiz bosib o‘tgan yo‘l haqida bilamiz. Va bizning bu ko‘magimiz ularga va ularning mehnatlariga bildirilgan minnatdorchiligimizning kichik bir qismidir”, — deb yozadi Komil Allamjonov.

Sputnik’ning yozishicha, jurnalist Rustam Obidov pansionatidan 18 million so‘m miqdorida qarzi bor. Mass-mediani rivojlantirish fondi ushbu to‘lovni o‘z zimmasiga olgan.

Eslatib o‘tamiz, oktabr oxirlarida Saida Mirziyoyeva Respublika bolalar kutubxonasini rekonstruksiya qilish boshlanganini ma’lum qilgandi. Mazkur loyiha metsenat sifatida ishtirok etib, katta yordam ko‘rsatayotgan saxovatli fuqarolar ko‘magi bilan amalga oshirilmoqda.