Dreamtech 30 soniyada koronavirusni aniqlaydigan “elektron burun”ni yaratdi

Dreamtech kompaniyasi 2021-yilda koronavirus infeksiyasini 30 soniyada aniqlashga qodir “elektron burun”ni taqdim etadi. Kompaniyaning ma’lum qilishicha, noyabr boshida uning sinov jarayonlarini yakunlagan, deb xabar beradi IXBT.

TheElec hisobotiga ko‘ra, Dreamtech “elektron burni” Isroilning Nanoscent firmasi bilan hamkorlikda yaratilgan. Ushbu qurilma odam koronavirusga chalingan yoki chalinmaganini uning nafas olishini tahlil qilish orqali aniqlay oladi. Bunga burundan chiqqan organik birikmalarni aniqlash orqali erishish mumkin. Shuningdek, ushbu gadjet odamlarda infeksiyaning biror belgisi kuzatilmaganida ham samarali hisoblanadi.

Dreamtech hozirda mazkur qurilmani Janubiy Koreyada ishlab chiqarishni boshlashga, shuningdek, ko‘plab mamlakat hukumatidan ruxsat olishga tayyorlanmoqda. Dreamtech’ning ta’kidlashicha, istalgan odam bir soat davomida o‘rganib, qurilmadan testni mustaqil o‘tkaza olishi mumkin.

Sinovlar Dreamtech qurilmasi PZR-test kabi natijalarni ko‘rsatishini namoyon etgan. Bundan tashqari, Dreamtech va Nanoscent o‘zining yangi qurilmasini to‘rtta ingliz futbol klubida, jumladan, Tottenham Hotspur’da sinovdan o‘tkazish niyatida.

Avvalroq AQShda sun’iy intellekt bemorning yo‘taliga qarab koronavirusni aniqlashni o‘rganib olgani to‘g‘risida xabar berilgandi.