Jizzaxda Tangisoy tog‘idan oltin rudasini o‘g‘irlashga urinish holatlari fosh etildi

Jizzax viloyatida joylashgan Tangisoy tog‘idan oltin rudasini qazib olib, o‘g‘irlashga uringan ikki nafar fuqaro ichki ishlar organlari tomonidan qo‘lga olindi. Bu haqda Jizzax viloyati IIB axborot xizmati xabar bergan.

Xabarda qayd etilishicha, ichki ishlar organlari xodimlari tomonidan G‘allaorol tumanida yerosti boyliklarini talon-toroj qilishning oldini olishga qaratilgan tadbirlar davomida “Buloqboshi” qishloq fuqarolar yig‘ini hududidagi Tangisoy tog‘idan oltin rudasini qaziyotgan 1995-yilda tug‘ilgan A.X. ushlangan. Buloqboshi qishlog‘ida yashovchi yigitdan 1 dona elektrodvigatel, 1 dona perforator hamda 10 kilogramm ruda olingan.

Noqonuniy faoliyat bilan shug‘ullanayotgan yana bir buloqboshilik fuqaro 1977-yilda tug‘ilgan A.K. ham ichki ishlar organlari xodimlari tomonidan qo‘lga olingan.

Tadbirda qonunbuzarning 1 dona elektrodvigatel va 1 dona perforator yordamida Tangisoydan 10 kilogramm ruda qazib olganligi ma’lum bo‘lgan.

Holatlar bo‘yicha G‘allaorol tumani ichki ishlar bo‘limi xodimlari tomonidan surishtiruv harakatlari olib borilmoqda, deyiladi Jizzax viloyati IIB axborot xizmatining xabarida.

Avval 2020-yilning avgust oyida Navoiyda eski oltin konidan 230 million so‘mlik tarkibida oltin mavjud bo‘lgan toshlarni o‘g‘irlayotgan shaxslar ushlangani, shuningdek, viloyatda o‘zi ishlab kelayotgan kondan 42 million so‘mlik oltin qum zarralarini o‘g‘irlashga uringan qo‘riqlash otryadi nazoratchisi qo‘lga olingani haqida xabarlar berilgan.