AQShning Nyu-York shahrida joylashgan Bronx hayvonot bog‘ini boshqaruvchi yovvoyi hayvonlarni muhofaza qilish jamiyati 1906-yilda bir necha kun davomida maymunlar qafasida afrikalik yigit eksponat sifatida turgani uchun uzr so‘radi. Bu haqda “RIA Novosti” xabar berdi.
Foto: “RIA Novosti”
“Biz hozirgi Kongo Demokratik Respublikasining mbuti xalqi vakili bo‘lgan markaziy afrikalik yigitga bo‘lgan munosabat uchun uzr so‘raymiz va buni qoralaymiz”, — deyiladi tashkilot xabarida.
Bronx hayvonot bog‘idagi maymunlar qafasiga joylashtirilgan Ota Benga, 1906-yil
Foto: Library of Congress
Bayonotda ta’kidlanishicha, 1906-yilda direktor Uilyam Xornadey boshchiligidagi hayvonot bog‘i vakillari Ota Benga ismli afrikalik yigitni maymunlar qafasiga tomosha uchun joylashtirgan. Bir necha kun o‘tgach, qora tanli ruhoniylar “sharmandali hodisa”dan jahli chiqqani sababli yigit vaqtincha saqlash joyiga jo‘natilgan. Qayd etilishicha, o‘n yildan so‘ng insoniy sifatlaridan ayrilgan, uyiga qayta olmaydigan bo‘lib qolgan Ota Benga fojiali tarzda o‘zini o‘ldirgan.
New York Times gazetasining xabar berishicha, afrikalik yigit saqlangan maymunlar qafasi 2012-yilda yopilgan. Benga bilan yuz bergan epizodni tasvirlagan gazetaning yozishicha, 1906-yilda hayvonot bog‘idagi yangi eksponat ommaga juda yoqqan, maymunlar qafasidagi odamni sherik sifatida tomosha qilishga qarshilik bildirganlar kam bo‘lgan. Gazetaning qayd etishicha, bu epizod o‘sha paytda Nyu-Yorkni qamrab olgan irqchilikning ajoyib bezagi bo‘lib qolishda davom etgan.
