Samarqand viloyatida do‘l aralash yog‘gan yomg‘ir sabab suv toshqini sodir bo‘ldi, deya xabar beradi “Daryo” muxbiri Farhod Norbo‘tayev.
Ta’kidlanishicha, bugun, 29-aprel kuni, Samarqand shahri va Bulung‘ur tumanida yog‘gan yomg‘ir sababli suv toshqini yuzaga kelgan va yo‘llarda noqulayliklarni keltirib chiqargan.
“Daryo”ga yuborilgan videolarda shaharning Rohat qo‘rg‘onida joylashgan mahallalardagi suv toshqini hamda M-37 Toshkent—Samarqand magistral yo‘lining Bulung‘ur tumanidan o‘tuvchi qismida yuzaga kelgan katta toshqinni ko‘rish mumkin.
Bulung‘ur tuman hokimligi axborot xizmatining “Daryo”ga ma’lum qilishicha, holat yuzasidan tuman hokimi o‘rinbosari Rabbimqul Xoljigitov rahbarligida tezkor ishchi guruh tuzilib, talafot miqdori aniqlanmoqda.
Ayni vaqtda ishchi guruh tumanning “Lalmikor” mahallasidagi vaziyat bilan tanishmoqda.
