Eron prezidenti mamlakat harbiylaridan urib tushirilgan samolyot uchun uzr so‘rashni talab qildi

Eron prezidenti Hasan Ruhoniy hukumat majlisidagi chiqishida mamlakat qurolli kuchlarini Ukraina yo‘lovchi samolyoti halokati uchun biror marta uzr so‘ramaganliklari uchun uzr so‘rashga chaqirdi. Prezidentning chiqishi Press TV telekanali tomonidan e’lon qilindi.

“Agar bu haqda kech e’lon qilingan bo‘lsa, ular buning uchun uzr so‘rashlari kerak”, — deb aytgan Ruhoniy. U harbiylarni, shuningdek, agar “ular nomaqbul ohangda gapirgan bo‘lsa”, buning uchun ham uzr so‘rashga chaqirgan.

Eron prezidentining so‘zlariga ko‘ra, aviahalokatning asl sababi kech e’lon qilinishi uni yashirishga urinish bilan bog‘liq emas, samolyotning qulashi Tehron uchun mutlaqo kutilmagan hodisa bo‘lgan. Ruhoniyning aytishicha, Eron harbiylari ilgari “yo‘lovchi samolyotiga nisbatan hech qachon bunday xatoga yo‘l qo‘ymagan” edi.

Prezidentning qo‘shimcha qilishicha, mamlakat qurolli kuchlari samolyot halokati uchun aybini tan olib, uzr so‘ragani “qilinishi kerak bo‘lgan ishlarning birinchisidir”. U harbiylardan hodisa surishtiruvi yuzasidan ko‘proq axborot berishni talab qilib, ushbu jarayonni nazorat qilishga va’da berdi. “Hodisa aybdori kim ekanini ma’lum qilish odamlarimiz uchun muhim”, — deya qayd etdi Ruhoniy.