Sochini bo‘yagan britaniyalik talaba qizning sog‘lig‘ida jiddiy muammolar kuzatilgan. Bu haqda talabaning so‘zlariga asoslanib The Sun xabar berdi.

Foto: The Sun

Soch bo‘yog‘i tarkibidagi para-Fenilendiamin moddasi Esseksda yashovchi 24 yoshli Shennon Sarstonda allergik reaksiya chaqirgan. Qiz sochini shokolad rangiga bo‘yashni maqsad qilgan, biroq ushbu jarayonni boshlashdan avval terisining allergiyaga moyilligi yuzasidan tibbiy tekshiruv o‘tkazmagan. Sababi ushbu bo‘yoq brendidagi bo‘yoqlardan uzoq vaqt davomida foydalanib yurgan.

Bo‘yoq sochga surtilayotgan vaqtda Sarstonning boshi lovullab achishgan va organizmi ushbu bo‘yoq ta’siriga qarshi kurashgan. Sochlar bo‘yalganidan keyin qizning bo‘ynida qizil dog‘lar paydo bo‘lgan, lekin u buni odatiy holat deb hisoblab ahamiyat bermagan.

Ertasiga tongda Shennon chap ko‘zida ulkan shish paydo bo‘lgan. Shifoxonaga yetib kelgan vaqtida ko‘zlarini ham ocha olmagan, peshonasi ishib ketgan, nafas olishga qiynala boshlagan. Shifokorlar qizda para-Fenilendiaminga allergiya borligini aniqlagan. Nafas olishni me’yorlashtirish uchun unga ingolyator berilgan va shishlarni kamaytirish uchun dorilar retsepti yozilgan.

Avvaliga davolash kor qilib, Sarston uyga qaytarib yuborilgandi. Ammo ertasiga tongda qizning ikki ko‘zi va bo‘yni ishib ketdi, boshi esa yonayotgandek achishardi. Shifokorlar to‘rt kun davomida talabadagi shishlarni kamaytirish va uning boshidagi bo‘yoq asoratlarini ketkazish bilan shug‘ullangan.

“Ular sochimni butunlay olib tashlashni taklif qilishdi, lekin men unday qilmasliklarini o‘tinib so‘radim. Nafas olishga juda qiynalardim, shifokorlar agar vaqtida yetib kelmaganimda halok bo‘lishim mumkinligini aytishdi. Boshim suvga to‘lib koptokdek ishib ketgan, ko‘zlarimni ocha olmasdim. Muayyan vaqt davomida hech nimani ko‘rmadim”, — deydi Shennon Sarston.

Ushbu voqeadan keyin Sarston uch oy davomida dori-darmonlar qabul qilib yurgan va allergiya asoratlaridan qutulgan.

Foto: The Sun

Foto: The Sun

Foto: The Sun

Foto: The Sun

Foto: The Sun

Avgust oyida shunga o‘xshash holat boshqa bir qiz — michiganlik 19 yoshli Sammer Jeksonda kuzatilgan, Qiz o‘zi foydalanadigan soch bo‘yog‘i qolmagani uchun boshqa bir brend mahsulotini xarid qilgan. Soch ildizigacha surilgan bo‘yoq boshni qattiq achishtirgan. Yakunda qizning bosh terisi va bo‘yni kimyoviy kuyishga uchrab, u kal bo‘lib qolgandi.