14-noyabr kuni O‘zbekistonda ilk marta o‘tkazilayotgan fan va atom birinchi festivali Toshkent shahridagi Atom texnologiyalari axborot markazi (ATAM)da ochildi.
Festivalning tantanali ochilish marosimida “O‘zatom” agentligi bosh direktorining birinchi o‘rinbosari Bahrom Mansurov, “Rosatom Markaziy Osiyo” bosh direktori Sergey Gromov, Yadro tadqiqotlari milliy universiteti “MIFI” Toshkent filiali ijrochi direktori Alisher Sanetullayev, “O‘zatom” agentligi, “Rosatom” davlat korporatsiyasi vakillari hamda faxriy mehmonlar ishtirok etdi.
Festival ATAM, Mirzo Ulug‘bek nomidagi O‘zbekiston milliy universiteti va Islom Karimov nomidagi Toshkent davlat texnika universitetlarida o‘tkaziladi.
Tadbir fan va innovatsiyalarni ommaviylashtirish, yoshlarni zamonaviy texnologiyalar bilan tanishtirish, ularning atom mavzusiga doir savollariga ishtirokchilardan javob olishi maqsadida o‘tkazilmoqda.
Festival dasturidan maktab o‘quvchilari uchun mo‘ljallangan “Atomniy dobl”, “Nauchniy xronograf”, “Texnostrategiya” kabi intellektual o‘yinlar, talabalar uchun ma’ruzalar va ilmiy-ommaviy “Razberem na atomi” tok-shousi joy olgan.
Ma’ruzachilar va olib boruvchilar sifatida o‘zbekistonlik va rossiyalik olim va mutaxassislar, jumladan, O‘zbekiston Respublikasi Fanlar akademiyasi vitse-prezidenti Baxtiyor Ibragimov, O‘zbekiston Respublikasi Fanlar akademiyasi Yadro fizikasi instituti direktori o‘rinbosari Ilhom Sodiqov, Fizika-energetika tadqiqotlari instituti (Rossiya Federatsiyasi) direktori Vitaliy Xryachkov, Ural federal universiteti “Atom stansiyalari va qayta tiklanuvchi energiya manbalari” (Rossiya Federatsiyasi) kafedrasi dotsenti Oleg Tashlikov, Yadro tadqiqotlari milliy universiteti “MIFI” (Rossiya Federatsiyasi) o‘qituvchisi Aleksey Puzakov va Roman Fomin, Chelyabinsk shahridagi Atom energiyasi axborot markazi (Rossiya Federatsiyasi) direktori va menejeri Larisa Matveyeva va Dmitriy Merzlov ishtirok etadilar.
“Bugungi kunda iqtisodiyot taraqqiyoti, avvalo, ilm-fan sohasi rivojlanishi bilan bog‘liqdir. Va bu sohalarda yuqori malakali mutaxassislar faoliyat ko‘rsatishi uchun ularni maktabdanoq tayyorlashni boshlash kerak. Bugungi festivalimizdek tadbirlar o‘quvchi va talabalarni nafaqat ilm-fan yutuqlari bilan tanishtiradi, balki hayot yo‘llarida asqatadigan kasb tanlashlarida ham yordam beradi”, – dedi “O‘zatom” agentligi bosh direktorining birinchi o‘rinbosari Bahrom Mansurov.
“Festivalni o‘tkazishdan maqsad –o‘quvchi va yoshlarda ilm bilan shug‘ullanishga qiziqish uyg‘otish, texnologiyalar rivojlanishi natijasida yoshlar oldida ochilayotgan imkoniyatlar bilan tanishtirishdir. Festival ishtirokchilarga yadro texnologiyalari qay tarzda inson hayoti yaxshilanishiga hissa qo‘shgani, ular turli sohalarda – sanoat, qishloq xo‘jaligi, tibbiyotda qo‘llanilishi va mamlakat taraqqiyotida tutgan o‘rni haqida tushunchalarga ega bo‘ladi.
Aminmizki, O‘zbekistonda ilk marta o‘tkazilayotgan fan va atom birinchi festivali barcha ishtirokchilar uchun haqiqiy bayram bo‘ladi, bunday tadbirlarni o‘tkazish esa biz uchun yaxshi an’anaga aylanadi”, – dedi “Rosatom Markaziy Osiyo” bosh direktori Sergey Gromov.
Tadbir ikki kun davom etadi va festivalda jami bo‘lib 600 nafarga yaqin o‘quvchi va talabalar ishtirok etishi kutilmoqda.
Ma’lumot uchun, fan va atom festivali – yadro fani va texnologiyalari sohasidagi ilmiy-ma’rifiy tadbirlar davomiyligidir. Tadbir atom energetikasi rivojlanayotgan ko‘plab mamlakatlar – Bangladesh, Hindiston, Belarus, Armaniston va boshqa davlatlarda katta, ommaviy tarzda o‘tkaziladi.
Izoh (0)