Sentabr oyidagi FIFA kunlarida Yevro—2020 saralash bosqichining 5 va 6-tur uchrashuvlari bo‘lib o‘tdi. “Daryo” guruhlardagi holat haqida to‘xtalib o‘tadi.

“F” guruhi

Foto: Twitter

Mazkur guruhda kutilganidek Ispaniya terma jamoasi o‘z gegemoniyasini o‘rnatdi. “Qizil furiya” 5-turda Ruminiya ustidan qiyin g‘alabani qo‘lga kiritgan bo‘lsa, keyingi o‘yinda Farer orollari terma jamoasiga javobsiz to‘rtta to‘p kiritdi. Guruhning yana bir favoritlaridan biri Shvetsiya esa Farerni yirik hisobda dog‘da qoldirib, Norvegiya bilan durang o‘ynab qo‘ydi. Ruminiya ham 6-turda Maltani yenggan holda guruhdagi vazyatini yaxshilab oldi.

Ispaniya yuz foizlik natija qayd etgan holda yakka peshqadam bo‘lib turibdi. Uning ketidan Shvetsiya (11 ochko), Ruminiya (10) va Norvegiya (9) jamoalari ketma-ket joylashgan. Farer orollari rasman imkoniyatni yo‘qotgan bo‘lsa, Malta keyingi bosqichgan chiqishdan deyarli umidini uzgan.

“G” guruhi

Foto: Twitter

“G” guruhida kurash qiziqarli ruhda kechmoqda. 6-turga kelib beshta jamoa Yevro—2020 yo‘llanmasi uchun deyarli bir xil imkoniyatga ega. So‘nggi ikki tur Polsha uchun muvaffaqiyatsiz o‘tdi. Dastlab polyaklar asosiy raqobatchi Sloveniyaga imkoniyatni boy berib qo‘ydi, keyin esa Avstriya bilan durang o‘ynadi. Buning natijasida 6-turda Isroilni yenggan Sloveniya oradagi farqni ikki ochkogacha qisqartirdi.

5-turda Latviyani yirik hisobda mag‘lub etgan Avstriya esa ochkolarini 10 taga yetkazib olgan holda uchinchi o‘ringa ko‘tarildi. Polsha (13) yetakchi bo‘lib turgan bo‘lsa, “Sloveniya” undan keyingi o‘rinda bormoqda. Shuningdek, Makedoniya va Isroil jamoalarida ham yaxshigina imkoniyat bor.

“H” guruhi

Foto: Twitter

Bu guruhda Turkiya va Fransiya terma jamoalari yetakchilikni davom ettirmoqda. Amaldagi mundial g‘oliblari Albaniya va Andorra termalari ustidan yirik hisobdagi g‘alabani qo‘lga kiritdi. Turklar esa dastlab so‘nggi daqiqalardagi gol evaziga Andorradan ustun keldi, so‘ngra Moldova darvozasi javobsiz to‘rt bor ishg‘ol qilindi. Peshqadamlar bilan bir xil ketayotgan Islandiya Moldovaga imkon qoldirmadi, biroq 6-turda Albaniyaga imkoniyatni boy berib qo‘ydi.

Shu tariqa, Turkiya va Fransiya 15 ochkodan to‘plagan holda guruhda peshqadamlik qilmoqda, turklar o‘zaro o‘yindagi g‘alaba evaziga birinchi o‘rinda turibdi. Ulardan uch ochko kam yiqqan Islandiya kuchli uchlikni yakunlab bergan. Shuningdek, Albaniya ham (9 ochko) o‘z imkoniyatlarini saqlab turibdi. Moldova va Andorra jamoalari esa rasman imkoniyatni qo‘ldan chiqardi.

“I” guruhi

Foto: Twitter

Mazkur guruhdagi holat avval boshdan taxmin qilinganidek tus olmoqda. Peshqadam Belgiya terma jamoasi San-Marino va Shotlandiyani yirik hisobda yenggan holda g‘alabani yurishini davom ettirdi. Rossiya esa Shotlandiya va Qozog‘iston ustidan qiyin g‘alabalarni qo‘lga kiritdi.

Belgiya terma jamoasi barcha o‘yinlarda g‘alaba qozongan holda 18 ochko bilan birinchi o‘rinda ketmoqda, bir mag‘lubiyat qayd etgan Rossiya esa (15) keyingi o‘rinda qolgan. Qozog‘iston (7), Kipr (7) va Shotlandiya (6) esa oz bo‘lsada imkoniyatni saqlab qolmoqda. San-Marino esa rasman imkoniyatdan mahrum bo‘ldi.

“J” guruhi

Foto: Twitter

Bu guruhda ikkinchi o‘rin uchun kurash qiziqarli bo‘lmoqda. Yuz foizlik natija ko‘rsatayotgan Italiya terma jamoasi o‘tgan ikki turda Armaniston va Finlyandiyadan ustun keldi. Finlar Italiyaga yutqazgan bo‘lsada, Gretsiya ustidan minimal hisobdagi g‘alabani qo‘lga kiritdi. Armaniston 6-turda Bosniya va Gertsegovinani taslim etgan holda o‘z imkoniyatlarini saqlab qoldi. Mazkur saralash bosqichida kutilmagan natijalar qayd etayotgan Gretsiya esa Lixtenshteyn bilan durang o‘ynab qo‘ydi.

Italiya 18 ochko bilan yakka peshqadamlik qilayotgan bo‘lsa, Finlyandiya (12) ikkinchi pog‘onani egallab turibdi. Uchinchi o‘rindagi Armaniston (9) ham yaxshi imkoniyatga ega bo‘lib turibdi. Gretsiya esa 6-turdan keyin 5 ochko to‘plagan holda imkoniyatlarini keskin kamaytirib yubordi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!