Insultni boshdan o‘tkazgan kamerunlik sobiq futbolchi Rigober Songning operatsiyasi muvaffaqiyatli o‘tdi

Insultni boshdan o‘tkazib, bir necha kundan keyin koma holatidan chiqqan Kamerun terma jamoasining sobiq futbolchisi Rigober Song muvaffaqiyatli operatsiya qilindi. Bu haqda L’Equipe nashriga tayanib, “TASS” xabar bermoqda.

40 yoshli Song Fransiya poytaxti Parij shahridagi “Pitye-Salpetriyer” klinikasida jarrohlik amaliyotini o‘tkazdi.

Ma’lumot uchun, Rigober Kamerun terma jamoasi safida o‘yin o‘tkazish bo‘yicha rekordchi hisoblanadi. Futbolchilik faoliyati davomida u Fransiyaning “Mets” va “Lans”, Italiyaning “Salernitana”, Angliyaning “Liverpul” va “Vest Hem”, Germaniyaning “Kyoln” hamda Turkiyaning “Galatasaroy” va “Trabzonspor” klublarida to‘p surgan.