Boks bo‘yicha -52 kilogramm vazn toifasida Rio–2016 Olimpiadasi g‘olibi Shahobiddin Zoirov 2-sentabr kuni vafot etgan O‘zbekistonning Birinchi Prezidenti Islom Karimovning mehri va g‘amxo‘rligini hech qachon unutmasligini ma’lum qildi, deb xabar beradi O‘zA.
– Prezidentimiz yoshlar bilan uchrashganda har birini bag‘riga bosib, ularning buyuk kelajak barpo etishiga ishonishini ta’kidlardi. Ha, Prezidentimiz biz, yoshlarga xuddi ota farzandiga, bobo nevarasiga ishongandek ishonardi.
Biz, yoshlar ham Yurtboshimizga suyanardik, yoshlarni qo‘llab-quvvatlash borasida har bir aytgan so‘zi, har bir ishi bizni ruhlantirar edi. Ana shunday mehr va e’tibor tufayli o‘zbek yoshlari dunyo maydoniga chiqdi, ko‘ksini kerib, dunyoning manaman degan davlati sportchilari bilan tengma-teng bellashishga qodir ekanini isbotladi.
XXXI yozgi Olimpiada oltin medalini qo‘lga kiritdim. Bu medalimni ona Vatanimizga, xalqimizga, Prezidentimizga bag‘ishladim. Bu g‘alabam yuksak baholanib, Yurtboshimizning 2016-yil 24-avgustdagi farmoni bilan “O‘zbekiston iftixori” faxriy unvoni bilan taqdirlandim.
Prezidentimiz Islom Karimovning mehri va g‘amxo‘rligini hech qachon unutmaymiz va bunga javoban keyingi Olimpiadalar va nufuzli xalqaro musobaqalarda ham Vatanimiz bayrog‘i baland ko‘tarilib, madhiyamiz baralla yangrashi uchun kuch-g‘ayratimizni ayamaymiz, – dedi Shahobiddin Zoirov.
Mavzuga oid:
Izoh (0)