Transport vositalari ishlab chiqarish bo‘yicha dunyodagi eng ilg‘or kompaniyalardan biri — Tesla o‘z ekoqishloqlarini qurmoqda, deb yozadi Main Cream.
Markaziy elektr tarmog‘idan to‘liq alohida bo‘lgan, oziq-ovqat ishlab chiqarish va chiqindilarni qayta ishlash bilan o‘zi shug‘ullanadigan koloniya Niderlandiya Qirolligida, Amsterdam yaqinida qurilmoqda. Kelasi yil boshidayoq kottejli shaharcha 25 ta oilani o‘z ichiga sig‘dira oladi.
Manzilgohdagi deyarli har bitta uy shisha karkas bilan qoplanadi, bu uylarning issiqlik izolyatsiyasini yaxshilaydi va qishda isitish xarajatlarini kamaytiradi. Shuningdek, natijada qishda o‘z yer maydonida meva-sabzavot o‘stirish imkoniyati paydo bo‘ladi.
Turar-joylarning o‘zi aylana shaklida bo‘lib, o‘rtasida issiqxona, avtomobilni quvvatlantirish stansiyalari, kichik ferma, baliqli ko‘l, avtomobil turargohlari, ochiq polizlar va jamoat hududlari joylashadi.
Loyiha bilan Amerikaning ReGen kompaniyasi shug‘ullanmoqda. Uning maqsadi oziq-ovqat ishlab chiqarishni zamonaviy turdagi manzilgohlarga integratsiyalashdan iborat.
ReGen taklif qilgan manzilgoh asosini gidroponika tashkil etadi: o‘simliklar oddiy tuproq bilan birga maxsus konteynerga ekiladi, u yerda ildiz doimiy ravishda ozuqaviy moddalar bilan boyitilgan maxsus suv bilan oziqlanadi.
ReGen kompaniyasi mutaxassislari hisob-kitoblariga ko‘ra, uch kishilik (bir farzandli) oila uchun 639 kvadrat metr maydon zarur bo‘ladi. An’anaviy fermerlikda esa ushbu raqam 8100 kvadrat metrga teng. Unga uy-joy, bog‘, poliz, hayvonlar uchun ferma hamda suv saqlash hududlari maydoni kiradi.
75—100 kishilik manzilgoh uchun esa jami 15 450 kvadrat metr maydon zarur bo‘ladi.
Izoh (0)