O‘zbekistonlik estrada ijodkorlari maxsus malaka oshirish o‘quv kurslarida tahsil olmoqda
“O‘zbeknavo” estrada birlashmasi tashabbusi bilan O‘zbekiston davlat san’at va madaniyat institutida 2016-yil davomida estrada ijodkorlari maxsus malaka oshirish o‘quv kurslarida tahsil olmoqda, deb yozadi “O‘zbeknavo” matbuot xizmati.
22-fevral kuni ushbu o‘quv kursining ilk kirish darsi bo‘lib o‘tdi. Unda O‘zbekiston san’at va madaniyat instituti rektori, professor B.Sayfullayev, Madaniyat va sport ishlari vaziri o‘rinbosari – “O‘zbeknavo” estrada birlashmasi Bosh direktori F. Jo‘rayev, Pedagog kadrlarni qayta tayyorlash va ularning malakasini oshirish tarmoq markazi direktori O. Hasanov va boshqa institut professor-o‘qituvchilari qatnashdi.
Darsda malaka oshirish kursining dolzarbligi, huquqiy asoslari, sahna madaniyati, institut tartib-qoidalari yuzasidan tushuncha berildi. Shuningdek, yosh estrada xonandalariga ushbu o‘quv dargohidan o‘zlariga kelajakda hamkorlik qiladigan ustoz tanlash takliflari bildirildi.
O‘quv kursidan ko‘zlangan maqsad estrada ijodkorlarini har tomonlama qo‘llab-quvvatlash, ularning erkin ijod qilishiga ko‘maklashish, hozirgi zamon talablarini inobatga olgan holda mutaxassislar yordamida ijodkorlar uchun zaruriy bo‘lgan bilim va ko‘nikmalar olishiga sharoit yaratish, jamiyat taraqqiyotida san’atkor ijodining ahamiyatini yanada kuchaytirish, ularni o‘z ijodlari orqali yoshlar tarbiyasi, ommaga vatanparvarlik ruhini singdirish, tinchlikni saqlash, Vatan ravnaqi yo‘lida fidokorona mehnat qilish, tahdidlardan ogohlikka chaqirish kabi yo‘nalishlarda xizmat qilishga undashdan iborat.
Ushbu o‘quv kurslarida mamlakatda demokratik islohotlarni yanada chuqurlashtirish va fuqarolik jamiyatini rivojlantirish, axborot xavfsizligi, nutq va sahna madaniyati, vokal san’ati, sahna harakati fanlari o‘quv dasturiga kiritilgan.
