Tayson Fyuri Vladimir Klichko bilan revansh jangini istalgan yerda o‘tkazishga tayyorligini ma’lum qildi. Bu haqda uning Sky Sports’ga bergan intervyusiga tayanib, “Korrespondent.net” xabar beradi.
“Men Manchesterdagi ‘Old Trafford’da kurashishni istagan bo‘lardim, lekin, umuman olib qaraganda, menga farqi yo‘q. Men Klichko bilan dunyoning istalgan nuqtasida kurashishga tayyorman. U meni o‘zining hududida, o‘z muxlislarining qo‘llab-quvvatlashi bilan yenga olmagan ekan, endi hech qayerda yenga olmaydi!”, — dedi Tayson Fyuri.
Avvalroq britaniyalik bokschi Tayson Fyuri va ukrainalik Vladimir Klichko o‘rtasida revansh jangini o‘tkazish 2016-yilning 7-may kuniga rejalashtirilganligi haqida xabar qilingan edi.
Eslatib o‘tamiz, Dyusseldorfda (Germaniya) 2015-yilning 29-noyabrga o‘tar kechasi WBA (Super), WBO va IBF yo‘nalishlari bo‘yicha o‘ta og‘ir vazndagi jahon chempioni Vladimir Klichko va Tayson Fyuri o‘rtasida jang bo‘lib o‘tgan va unda hakamlarning yakdil qaroriga ko‘ra Fyuri g‘olib deb topilgan edi.
Izoh (0)