Bugun,

  • USD 10940.05
  • RUB 182.26
  • EUR 11121.65
National Geographic jurnali qulayotgan qushlar vodiysi, aqlbovar qilmas saroblar makoni, g‘alati yerosti yo‘llari tarmog‘i va sayohatchining asabini yaxshigina egovlashi mumkin bo‘lgan yana yetti qiziqarli joyning ro‘yxatini tuzdi.

1. Shensi viloyatidagi sharshara (Xitoy)

Foto: “Photobase.cn”

Foto: “Photobase.cn”
Bu sharshara hozirga qadar yechilmagan tabiat tilsimidir. Qishda, havo harorati Selsiy bo‘yicha 30 daraja sovuq bo‘lgan vaqtda muzlamaydigan sharshara 25 yilda bir marta — yoz chillasida to‘satdan muzlab qoladi.

2. Jatinga vodiysi (Hindiston)

Foto: AirJatra

Foto: AirJatra
Hindistonning Assam shtatidagi Jatinga vodiysida yozning so‘nggi kunlarida g‘ayritabiiy hodisalar yuz beradi. Bu yerga yarim kechasi qariyb hushsiz holdagi qushlar to‘dasi uchib kelib, shu qadar pastlaydiki, aholi ularni oddiy tayoqlar bilan urib tushirib, pishirish uchun olovga tashlaydi. Ornitologlar bu hodisa sababini tushuntirib berolmayapti, mahalliy aholi esa buni tangrining tuhfasi, deb hisoblaydi.

3. O‘lim vodiysi (AQSh)

Foto: National Geographic

Foto: National Geographic
Bu yerda g‘alati sudraluvchi toshlarni kuzatish mumkin, lekin hech kim bu toshlar nima sababdan sudralayotganini tushuntirib berolmaydi. Shuningdek, aynan O‘lim vodiysida Shimoliy Amerikadagi eng yuqori havo harorati (Selsiy bo‘yicha 57 daraja issiq) qayd etilgan. Bundan tashqari, “o‘zga sayyoralarning manzaralari”ni tomosha qilish uchun ham bu yerga safar qilsa bo‘ladi — Gollivudning “boshqa dunyolar” haqidagi filmlari, ko‘pincha, shu yerda suratga olinadi.

4. Niidzima oroli (Yaponiya)

Foto: Gismeteo

Foto: Gismeteo
Tokiodan 970 kilometr uzoqlikda, okean o‘rtasida kichik bir orol bor. Qiziq tomoni, orol 2013-yil 20-noyabr kuni paydo bo‘lgan. Ushbu hodisa kameraga yozib olingan — sohil qo‘riqlash xizmati suvdan otilayotgan vulqonni videoga olgan. Vulqon suv ostida yashirinish o‘rniga, o‘sishda davom etdi va bugungi kunda Bonin orollari tizmasining to‘laqonli a’zosi hisoblanadi.

5. Patomskiy krateri (Rossiya)

Foto: “Sergey-mironov.livejournal.com”

Foto: “Sergey-mironov.livejournal.com”
Irkutsk viloyatidagi Patomskiy krateri Rossiyadagi eng sirli obyektlardan biri hisoblanadi. Bu yerga 1960-yillardan beri ko‘plab ilmiy ekspeditsiyalar uyushtirilgan bo‘lsa-da, noodatiy konus ko‘rinishidagi halqali tuzilmaning kelib chiqishi to‘la ochib berilmagan. Hozircha ikki taxmin bor — krater g‘ayrioddiy magmatik jarayonlar yoki meteorit tushishi oqibatida yuzaga kelgan. Geologik topilmaning yoshi 500 yilga teng, deb taxmin qilinadi.

6. Frangokastello qasri (Gretsiya)

Foto: National Geographic

Foto: National Geographic
Krit orolidagi Frangokastello qasrida Yer yuzidagi yagona hujjatlashtirilgan xronosarob kuzatiladi. Yozning boshida, kun endigina yorishayotganida ommaviy jang sahnasini kuzatgan guvohlar ko‘plab topiladi — ba’zilar shu qadar ta’sirlanib ketganki, hatto qurollarning jaranglashi va jangchilarning baqirishlarini ham eshitganini aytadi. Ikkinchi Jahon urushida nemis askarlari ushbu sarobga qarata, qo‘rqqanidan, o‘t ochgani haqida gap-so‘zlar bor.

7. Medveditsa tizmasi (Rossiya)

Foto: Liveinternet

Foto: Liveinternet
Rossiyaning Volgograd viloyatidagi uncha katta bo‘lmagan tepaliklar tizmasida muntazam ravishda sirli tabiat hodisalari yuz berib turadi. Shar chaqnashlari, daraxt poyalarining qiyshayib ketishi — bu yerda kuzatiladigan g‘ayrioddiy hodisalarning bir qismi, xolos. Bundan tashqari, Medveditsa tizmasi ostida sirli yerosti yo‘llari mavjud. Mahalliy aholi buni hukumatning maxfiy bazasi, qadimiy tamaddun izlari va hatto transport tarmog‘i ham, deb taxmin qiladi. Olimlar esa bu borada hozircha biror jo‘yali fikr ayta olmayapti.

8. Qora bambuk jarligi (Xitoy)

Foto: “Vsluh.net”

Foto: “Vsluh.net”
Mazkur xushmanzara joyda ko‘plab odamlar halok bo‘lgan va yo‘qolgan, deb taxmin qilinadi: birgina XX asrning o‘zida bu yerda 300 ga yaqin odam bedarak yo‘qolgan, samolyot halokatga uchragan, xaritashunoslar va o‘rmon nazoratchilarining guruhlari izsiz g‘oyib bo‘lgan. Olimlar bu hodisalarning asosiy sababini haligacha aniqlay olgan emas.

9. Skeletlar sohili (Namibiya)

Foto: National Geographic

Foto: National Geographic
Namib sahrosi dengiz bilan to‘qnashadigan joy mana shunday qo‘rqinchli nom bilan ataladi — sohil va sayozliklar ham zamonaviy, ham qadimiy dengizlarning qoldiqlari bilan to‘lib-toshgan. Doimiy tuman, ulkan suvosti qoyalari va tez-tez yuz berib turadigan bo‘ronlar dengizchilar uchun eng xavfli vaziyatlarni yuzaga keltiradi. Bu yerda yuz bergan kema halokatlarida omon qolganlar deyarli bo‘lmagan.

10. Tosh maqbaralar (Rokniya, Koreya, Indoneziya, Isroil, Portugaliya, Skandinaviya, Rossiya)

Foto: National Geographic

Foto: National Geographic

Qadimshunoslarning fikricha, qachonlardir bu tosh yodgorliklar qadimgi kohinlarning qurbonlik keltiradigan joyi sifatida xizmat qilgan. Bir qarashda ularning hech qanday o‘ziga xosligi yo‘qdek, biroq bir-biriga o‘xshash bunday tosh maqbaralar deyarli bir vaqtning o‘zida dunyoning turli burchaklarida qurilgani ham qo‘rqitadi, ham o‘ziga jalb qiladi.

Izoh
Asosiy yangiliklar
Dunyo
Irlandiyadagi qamoqxonada “buyuk qochish”, sakkiz soatli ish rejimini qo‘llagan Genri Ford va qon quyish bo‘yicha birinchi muvaffaqiyatli amaliyot. Kun xronologiya...
Mahalliy
“Daryo” reportaji: Namangandan topilgan zardushtiylar ibodatxonasining dunyoda tengi yo‘qligi aytilmoqda. Bu yerdagi 70 ta otashkadada tun-kun olov yonib turgan (v...
Madaniyat
O‘zbekistonda o‘tkazilgan Mokkoji Korea festivali va K-pop konserti — suratlarda