3-may kuni Toshkentda joylashgan “O‘zbekiston” sport majmuasida taekvondoning ITF yo‘nalishi bo‘yicha sohibqiron Amir Temur xotirasiga bag‘ishlangan O‘zbekiston ochiq chempionatiga start berildi. Bu haqda UzReport xabar berdi.
Mazkur musobaqa Madaniyat va sport ishlari vazirligi, O‘zbekiston taekvondo milliy assotsiatsiyasi hamda Sharq yakkakurashlari va jang san’atini rivojlantirish markazi tomonidan o‘sib kelayotgan yosh avlod o‘rtasida sog‘lom turmush tarzini targ‘ib qilish, yosh iqtidor egalarini har tomonlama qo‘llab-quvvatlash, mohir taekvondochilarni terma jamoalarimizga jalb qilish maqsadida tashkil etildi.
Bo‘lib o‘tayotgan musobaqada O‘zbekistonning barcha viloyatlaridan hamda Rossiya va Qozog‘istondan kelgan 500 dan ortiq sportchi ishtirok etmoqda.
Chempionatning ochilish marosimida so‘zga chiqqan vazirlik hamda tashkilot rahbarlari, ishtirokchilarga omad tilab, musobaqaga tashrif buyurgan vakillarni tashakkurnoma hamda qimmatbaho sovg‘alar bilan taqdirladi.
Musobaqa g‘oliblari bellashuvlar so‘ngida aniqlanadi va tatamiga chiqqan eng yaxshi taekvondochilar O‘zbekiston terma jamoasiga saralab olinadi.
Izoh (0)