30-aprel kuni poytaxtimizdagi Milliy matbuot markazida bo‘lib o‘tgan matbuot anjumani “Umumiy o‘rta ta’lim maktablari, akademik litsey va kasb-hunar kollejlari o‘quvchilari davomatini yaxshilash, ular orasida huquqbuzarliklarning oldini olish hamda turli yot illatlardan saqlash” mavzusiga bag‘ishlandi. Bu haqda UzReport xabar berdi.
Asosiy e’tibor voyaga yetmaganlar va yoshlar o‘rtasida sog‘lom turmush tarzini targ‘ib qilish, ularning huquqiy ongini oshirishga qaratilib, umumta’lim maktablarida 48 ming, kasb-hunar kollej va akademik litseylarda 16 ming, oliy o‘quv yurtlarida 590, mahalla va jamoatchilik o‘rtasida 25 ming marotabadan ortiq uchrashuvlar, davra suhbatlari, muloqotlar o‘tkazildi.
Bugungi kunda respublikada faoliyat ko'rsatayotgan 3743 ta militsiya tayanch punktlarining 85 foizi atrofida sport maydonchalari, 70 foizdan ortig‘i atrofida fakultativ to‘garaklar, kichik biznes shoxobchalari tashkil etildi. Bu o‘z navbatida yoshlar orasida huquqbuzarliklar oldini olishda o'zining ijobiy samarasini bermoqda.
Anjumanda ta’kidlanganidek, hamkorlikda amalga oshirilgan profilaktik-ogohlantiruv ishlari natijasida voyaga yetmaganlar tomonidan sodir etilgan jinoyatlarning yildan-yilga kamayishiga erishilmoqda. Jumladan, so‘nggi besh yillikda voyaga yetmaganlar jinoyatchiligi 14 foizga kamayishiga erishildi.
Ta’kidlash joiz, bugungi kunda mamlakatimizda 18 yoshgacha bo‘lgan yoshlar umumiy aholining 40 foizini, 30 yoshgacha bo‘lganlar esa 64 foizini tashkil etmoqda.
Izoh (0)