2014-yilning 3—5-aprel kunlari Xiva shahridagi 12-sonli davlat ixtisoslashgan maktab-internati sport zalida 1997—1998-yillarda tug‘ilgan o‘smirlar va qizlar o‘rtasida belbog‘li kurash bo‘yicha O‘zbekiston chempionati bo‘lib o‘tdi. Unda mamlakatning turli hududlaridan kelgan 230 ga yaqin yosh polvon ishtirok etdi. Uch kun davomida polvonlar belbog‘li kurash va uning erkin turi bo‘yicha o‘zaro bellashdi. Bu haqda “Turkiston press” xabar berdi.
Respublika yoshlar terma jamoasini shakllantirishda saralash bosqichini o‘tagan musobaqada turli vazn toifasida kuch sinashgan yosh polvonlar — namanganlik Murod Hamidov, Ulug‘bek Mirzayev, Hasanboy Davronov, Abror Abdullayev, Abdurashid G‘aniyev, farg‘onalik Bahodir Ahmadjonov, Jahongir Qobulov, xorazmlik Og‘abek Jumanazarov, buxorolik Bobur Nazarov, andijonlik Muhammad Ashurov, toshkentlik Sanjar Tursunaliyevlar shohsupaning yuqori pog‘onasiga ko‘tarildi va O‘zbekiston chempioni degan sharafli nomga sazovor bo‘ldi.
Qizlar o‘rtasidagi bahslar ham qizg‘in o‘tdi. Bellashuvlarda Andijon viloyatidan Zulxumor Isanova, Shodiya Sadriddinova, Shahzoda Ergasheva, Farg‘ona viloyatidan E’zozxon Ismoilova, Namangan viloyatidan Dilafro‘z Mamajonova, Xorazm viloyatidan Komila Kasatkina o‘z vazn toifalari bo‘yicha g‘oliblikni qo‘lga kiritdi.
— Bunday nufuzli musobaqada ilk bor qatnashishim, — deydi O‘zbekiston chempioni Zulxumor Isanova. — Raqiblarim juda kuchli ekan, ularni yengish oson bo‘lmadi. Shuning uchun astoydil harakat qildim, bor mahoratimni ishga solib g‘alabaga erishdim.
Musobaqa g‘olib va sovrindorlari O‘zbekiston belbog‘li kurash federatsiyasi hamda homiy tashkilotlarning diplom va qimmatbaho sovg‘alari bilan taqdirlandi.
Izoh (0)