O‘zbekistonda 2026-yil yakunigacha yillik inflyatsiya darajasi 6,5 foizga tushishi kutilmoqda. Bu haqda 28-yanvar kuni Toshkent shahrida o‘tkazilgan matbuot anjumanida Markaziy bank raisi o‘rinbosari Nodirbek Ochilov maʼlum qildi, deya xabar berdi “Daryo” muxbiri.
Nodirbek Ochilov prognozda mamlakatda kuzatilayotgan gaz va elektr uzilishlari, bahorda oshgan energiya resurslari tariflarining ikkilamchi taʼsiri ham inobatga olinganini aytdi.
“Energiya resurslari narxlari o‘zgarishi oxirgi paytlarda inflyatsiyaning asosiy drayveri bo‘lyapti. Lekin umumiy inflyatsiya pasaymoqda. Energiya narxlarining taʼsirlari bo‘ldi va ikkilamchi taʼsirlari ham keyingi davrlarda bo‘lishini kutyapmiz. Lekin bu bilan tugamaydi, hukumat bilan birgalikda chora-tadbirlar bo‘yicha takliflar kiritilgan. Yaqin kunlarda bu bo‘yicha tegishli qaror qabul qilinishi kutilyapti”, dedi rais o‘rinbosari.
Nodirbek Ochilovning taʼkidlashicha, Markaziy bank hukumatdan energiya resurslari taklifini ko‘paytirishni, narxlarni har oy emas, balki maʼlum davrni belgilagan tarzda oshirishni so‘ragan.
“Yonilg‘i narxi oshishi, metan zapravkalardagi ayrim cheklovlar transport xizmatlarining narxiga o‘tadi. Biz hisob-kitob jarayonida buni transport xizmatlari narxida ko‘ramiz. U esa umumiy inflyatsiyaning ichida turibdi. Prognozlarimizda bu kabi narxlarni oshiruvchi taʼsirlarning barchasi inobatga olingan. Turli omillarni hisobga olib, prognozimiz 6,5 foiz darajasida shakllandi”, dedi ekspert.
Taʼkidlanishicha, inflyatsiyaga uchta asosiy oshiruvchi omil bosim o‘tkazishi kuzatilmoqda. Ulardan biri xizmatlar narxi sezilarli ortayotgani bilan bog‘liq. Ayrim turdagi oziq-ovqat mahsulotlari narxlari ham yuqori saqlanib qolmoqda. Shu bilan birga, talabni qo‘llab-quvvatlovchi faktorlardan bo‘lgan daromadlar oshayotgani aholi isteʼmol kayfiyati yaxshilanayotgani bildirildi.
Maʼlumot uchun, 2025-yil dekabr oyida mamlakatdagi yillik inflyatsiya darajasi 7,3 foizni tashkil etgan. O‘tgan oy boshidagi prognozlarda 2026-yil yakuniga borib inflyatsiya 7 foizga tushishi prognoz qilingandi. Endilikda bu kutilma 6,5 foiz atrofida shakllangani aytildi.
