Oʻzbekistonda 2025-yil 2-sentyabrdan boshlab Ai-80 benzinini ishlab chiqarish va birjada sotish toʻxtatildi. Bugun, 11-sentyabr kuni Toshkent shahrida oʻtkazilgan matbuot anjumanida buning narxlarga taʼsiri haqida soʻraldi.
Markaziy bank raisi Timur Ishmetov “Daryo” muxbiri savoliga javoban, Ai-80 benzinidan voz kechilishi inflyatsiyani oshiruvchi omil ekanini aytdi.
“Ai-80 benzinini ishlab chiqarishni toʻxtatish masalasi bir necha yildan beri choʻzilayotgandi. Qachondir shunday boʻlishi kerak edi. Albatta, ishlab chiqarish toʻxtatilishining inflyatsiyaga taʼsir bor. Hozirgi inflyatsiya statistikasiga, yaʼni narxlarni oshiruvchi asosiy omillar qatorida benzin yoqilgʻisi ham bor. Bu oʻrta muddatda xatar keltiruvchi yoʻnalishlardan hisoblanadi. Ayniqsa, narxlar oshishi masalasi koʻproq inflyatsion kutilmalarda ham saqlanib qolyapti”, dedi Markaziy bank rahbari.
Timur Ishmetov joriy yil yakunida kutilayotgan inflyatsiya boʻyicha prognoz yangilanganini ham maʼlum qildi. Qayd etilishicha, 2025-yil oxiriga kelib yillik inflyatsiya darajasi 8,7 foiz boʻlishi kutilmoqda. Yanvar oyida bu koʻrsatkich 7−8 foiz, birinchi chorak yakunida esa 8 foiz boʻlishi prognoz qilingandi. Biroq hozirgi kutilmalar avvalgilaridan yomonlashgan.
