“Ўзбекнефтгаз” АЖ бошқарув раиси Абдуғани Сангинов Хитой миллий нефть корпорацияси (CNPC) таркибидаги CCDC бурғилаш компанияси вакиллари билан ишчи учрашув ўтказди. Бу ҳақда “Ўзбекнефтгаз” АЖ ахборот хизмати хабар қилди.
Мулоқот давомида Бойсун туманидаги “Мустақилликнинг 25 йиллиги” конида юзага келган техноген аварияни бартараф этиш ишларини жадаллаштириш масалалари муҳокама қилинган.
Томонлар аварияни бартараф этиш бўйича амалий ишларга тезкор киришиш учун барча тайёргарлик жараёнларини қисқа муддатларда якунлаш муҳимлигини таъкидлаган. Хусусан, объектга махсус бурғилаш дастгоҳлари, юқори босим шароитида ишлашга мўлжалланган технологик ускуналар ҳамда зарур техник воситаларни етказиш, малакали мутахассисларни жалб этиш ва қутқарув-бурғилаш ишларини ўз вақтида бошлашга келишиб олинган.
Шунингдек, лойиҳани белгиланган муддатларда амалга ошириш ва техник ечимларни тезкор қабул қилиш мақсадида икки компания мутахассислари ўртасидаги ҳамкорликни янада кучайтириш белгиланган.
Учрашувда Бойсундаги техноген авария тўлиқ бартараф этилганидан сўнг, нефть-газ соҳасида янги бурғилаш ва геология-қидирув дастурларини амалга ошириш бўйича қўшма лойиҳаларни кенгайтириш масалалари ҳам кўриб чиқилган.
Бойсундаги газ конида кузатилган авария
“Мустақилликнинг 25 йиллиги” кони Бойсун шаҳридан 20 километр масофада жойлашган. Коннинг газ захиралари 150 миллиард куб метрдан ортиқлиги тахмин қилинади. Айрим манбаларга кўра, коннинг газ захиралари 170 миллиард кубометрга етиши мумкин.
2024 йил 1 сентябрь куни Бойсундаги “Мустақилликнинг 25 йиллиги” (М25) конининг 604-қудуғи бурғилаш ишлари олиб борилаётган пайтда портлаб, ёнғин чиққанди. Кейин атрофга олтингугурт (водород сулфид) гази чиқиши кузатилган. Кон ҳудудига яқин жойларда яшовчи аҳоли зудлик билан бошқа ҳудудларга кўчирилган.
Орадан ярим ой ўтиб, 17 сентябрь куни конда навбатдаги портлаш юз берган. Оқибатда 11 киши жароҳатланган, коннинг 4 ишчиси воқеа жойида ҳалок бўлган.
Кейинчалик 2025 йил 27 мартда ва 5 майида ҳам портлашлар кузатилган. Ўтган салкам икки йил давомида конда қатор газ ёниб чиқиш ҳолатлари қайд этилган. Ижтимоий тармоқларда ҳудуд аҳолиси газ ҳидига чидаб бўлмаслиги, бундан одамлар азият чекаётгани, ҳатто касалликлар орттириб олгани ҳақида кўп чиқишлар қилди.
Кейин 2025 йилнинг ноябрида Бойсундаги кондан яна газ сизиб чиққани ҳақида хабарлар тарқалди. Энергетика вазирлиги “М-25” конининг 202-сон газ қудуғида аввалдан ёқиб қўйилган оловнинг вақтинча сўниш ҳолати кузатилганини, бу ҳолат кондаги геологик жараён натижасида юз берганини маълум қилганди.
