АҚШ президенти Дональд Трамп кутилмаган ҳолат юз бериб, унга суиқасд қилинган тақдирда вице-президент Жей Ди Венсга қандай йўл тутиш бўйича аниқ кўрсатмалар ёзиб қолдирди. Бу ҳақда Оқ уй мулозими Себастьян Горкага таяниб, The New York Post хабар берди.
Трамп маъмуриятининг антитеррор стратегиясини бошқарган Горканинг сўзларига кўра, президентнинг иш столи тортмасида вице-президент номига ёзилган хат мавжуд.
“Ишонинг, бизда махсус протоколлар бор. Мен уларни очиқлай олмайман, лекин ҳамма нарса тайёр”, деди у.
Трамп январь ойида берган интервьюсида, агар Эрон унга суиқасд қилса, ушбу мамлакатни йўқ қилиб ташлаш ҳақида буйруқ қолдирганини айтган эди.
“Агар менга бирор нарса бўлса, бутун бир мамлакат йўқ қилиб юборилади”, деган эди президент.
Маълумотларга кўра, 2024 йилги сайлов кампанияси даврида Трампга суиқасд режалаштирган эронлик мулозим 2026 йил март ойида “Эпик ғазаб” операцияси давомида ўлдирилган.
Хитойга ташриф ва хавфсизлик масалалари
Дональд Трамп ҳозирда Хитой президенти билан учрашув доирасида икки кунлик сафар билан Осиё давлатида бўлиб турибди. Томонлар савдо алоқалари, сунъий интеллект ва ядро қуроли масалаларини муҳокама қилади. Шунингдек, баъзи маслаҳатчилар ушбу учрашувдан Ҳормуз бўғозини очиш ва Эрон урушини тўхтатишда Хитой ёрдамини олиш учун фойдаланишни таклиф қилмоқда.
Антитеррор хизмати раҳбарининг фикрича, Хитой Трампни йўқ қилиш учун етарли сабабларга эга.
“Фақатгина Трамп уларнинг дунё устидан ҳукмронлик қилишига йўл қўймай турибди, шунинг учун уларда президентни йўқ қилиш учун ҳар қандай сабаб бор. Албатта, буни у ерда (Хитойда) амалга оширмасликлари мумкин. Лекин менга айтишларича, улар шунчаки ҳавога бирор нарса сепишлари ва бу президентни 30 кундан кейин касал қилиб қўйиши мумкин”, деди Горка.
Шунга қарамай, Горка президентнинг хавфсизлигига ишончи комил эканини билдирди.
“Ҳамма бу одам билан бир столда ўтиришни ва у томонидан тан олинишни истайди. Трамо Эйзенхауэрдан кейин биз кўрган энг қудратли шахс”, дея қўшимча қилди у.
Трампга қилинган суиқасдлар
Трамп шу пайтгача бир неча бор суиқасдлардан омон қолган. Хусусан:
- 2024 йил 13 июлда Пенсилванияда Томас Меттю Крукс Трампга қарата ўт очган, ўқ президентнинг ўнг қулоғига тегиб, ўтиб кетган.
- Флорида штатида Райан Раут снайпер билан президентнинг голф майдонида пойлаб турганида қўлга олинган ва умрбод қамоққа ҳукм қилинган.
- 2026 йил 25 апрелда Коул Аллен исмли шахс Вашингтондаги меҳмонхонада Трампга қарата ўт очмоқчи бўлган, бироқ махфий хизмат томонидан қўлга олинган.
“Энг кўп иш қиладиган ва энг катта таъсирга эга одамларни ҳамиша нишонга олишади”, дея муносабат билдирган эди Трамп сўнгги суиқасд уринишидан кейин.
