AQSH prezidenti Donald Tramp 20-yanvar kuni Tehron Oq uy rahbariga nisbatan suiqasd uyushtirishga muvaffaq bo‘lsa, Eron “yer yuzidan butunlay yo‘q qilinishi”ni aytdi. Bu haqda Al Arabiya xabar berdi.


Ikki davlat ham agar o‘z yetakchilariga nisbatan suiqasd amalga oshirilsa, keng ko‘lamli urush boshlash bilan bir-biriga tahdid qilmoqda.

“Juda qat’iy ko‘rsatmalarim bor. Agar biror kor-hol yuz bersa, Eron yer yuzidan supurib tashlanadi”, dedi 79 yoshli Tramp 20-yanvar kuni efirga uzatilgan News Nation nashriga bergan intervyusida.

Eron tomoni ham AQSH prezidentining ushbu chiqishidan avval Tramp borasida bayonot bergandi. Xususan, eronlik general Abulfazl Shekarchi mamlakat oliy rahnamosi Oyatulloh Ali Xomanaiyga nisbatan har qanday tahdidga keskin javob qaytarilishini ta’kidlagandi.

“Trampga ayonki, agar bizning rahnamomizga nisbatan tajovuz qo‘li cho‘zilsa, biz nafaqat o‘sha qo‘lni chopamiz, balki ularning dunyosiga o‘t qo‘yamiz va mintaqada ular uchun hech qanday xavfsiz boshpana qoldirmaymiz”, deya generalning so‘zlaridan iqtibos keltirgan Eron davlat OAV.

Tramp bundan oldin ham Eronga bir necha bor tahdid qilgan, jumladan, so‘nggi bora u Yaqin Sharq mamlakatiga yangi rahbariyat izlash vaqti kelganini aytgan edi. U bu bilan Xomanaiyning 37 yillik hukmronligiga chek qo‘yishni nazarda tutgan.
Erondagi vaziyat va qurbonlar
Hozirda Eron 1979-yilgi Islom inqilobidan keyingi eng yirik hukumatga qarshi namoyishlar iskanjasida qolmoqda. Inson huquqlari tashkilotlari to‘qnashuvlarda halok bo‘lganlar sonini aniqlashga qiynalmoqda. Sababi mamlakatda internet tarmog‘i uzib qo‘yilgan. HRANA (AQSH) agentligiga ko‘ra, 4 000 dan ortiq o‘lim holati rasman tasdiqlagan.
Iran Human Rights NGO (Norvegiya) tashkiloti esa aloqa cheklovlari tufayli aniq raqamlarni olish qiyinligini, biroq qurbonlar soni OAVdagi eng yuqori taxminlardan ham oshib ketishi va 20 000 kishiga yetishi mumkinligini bildirmoqda.
Iqtisodiy inqiroz va xalqaro chaqiriqlar
Namoyishlar 2025-yilning 28-dekabr kuni, mamlakat valyutasi rekord darajada qadrsizlangani va yuqori inflyatsiya ortidan boshlangan edi. Namoyishchilar bir necha o‘n yillardan beri demokratik islohotlarga qarshilik qilib kelayotgan 86 yoshli Oyatulloh Ali Xomanaiy boshqaruviga chek qo‘yishni talab qilmoqda.
Eron diasporasi vakillari, jumladan, surgundagi Nobel mukofoti sovrindori Shirin Ibodiy AQSHni Tehron hukmron apparatiga qarshi aralashishga chaqirdi. Ibodiy Eron oliy rahnamosi va “Islom inqilobi qo‘riqchilari korpusi” qo‘mondonlariga nisbatan aniq yo‘naltirilgan zarbalar berishni so‘ramoqda.