АҚШ президенти Дональд Трамп ўз сиёсий фаолияти якунланганидан кейин Американинг кўплаб оммавий ахборот воситалари банкрот бўлишини билдирди. Бу ҳақда у Оқ уйда аккредитациядан ўтган журналистлар уюшмасининг кечки зиёфатида гапирди.
Унинг айтишича, Америка оммавий ахборот воситалари унинг ҳисобидан аудитория ва даромад топмоқда.
“Омадингиз қанчалик келганини тасаввур ҳам қила олмайсиз. Мен кетганимдан кейин ҳаммангиз хонавайрон бўласиз. Сизнинг бизнес моделингиз тугайди”, деди Америка етакчиси.
Трамп бу гапни ҳазил тариқасида айтган бўлса-да, фикрини яна бир бор такрорлаган.
“Йўқ, бу ҳақиқат. Мен бўлмаганимда ҳаммангиз банкрот бўласиз, чунки ким ҳақида ёзишни билмай қоласиз. Бошқа одамлар билан ҳеч кимнинг иши йўқ”, дея қўшимча қилган у.
Унинг таъкидлашича, Америка нашрлари ва телеканаллари ўзи ҳақида асосан салбий материаллар берса ҳам, аудиторияни айнан Трамп ҳақидаги хабарлар жалб қилади.
Президент қарийб бир соат давом этган нутқида фақат журналистлар билан чекланиб қолмаган. У CNN бошловчиси Кейтлан Коллинс, соғлиқни сақлаш вазири кичик Роберт Кеннеди, сиёсатчилар Крис Кристи ва Жерри Надлер ҳамда хонанда Брюс Спрингстин устидан ҳам турли ҳазиллар қилган.
Шунингдек, Трамп саҳнага “Трумп 2028” ёзуви туширилган қизил кепкада чиқиб, президентликка учинчи ва ҳатто тўртинчи марта номзод бўлиши мумкинлигини билдирган.
Баҳорда Оқ уйда аккредитациядан ўтган мухбирлар ассоциациясининг қабул маросими 25 апрель куни Washington Hilton меҳмонхонасида ўтказилиши режалаштирилган эди. Ўшанда Трамп ва вице-президент Жей Ди Венс ҳам иштирок этган, Америка маъмуриятининг бутун раҳбарияти йиғилган тадбир отишма ҳодисаси туфайли тўхтатиб қўйилганди. Натижада АҚШ Махфий хизмати ходимларидан бири, қўриқчи жароҳат олган. Ўқ узган шахс, 31 ёшли Коул Томас Аллен қўлга олинган. Аллен АҚШ президенти ҳаётига суиқасд қилишга уриниш, оғир жиноят содир этиш мақсадида ўқотар қурол ва ўқ-дориларни ташиш, шунингдек, жиноят содир этишда ўқотар қуролдан фойдаланиш моддалари бўйича айбланмоқда.
