АҚШ президенти Дональд Трамп 1 май куни қонун чиқарувчиларни Эрон билан уруш якунлангани ҳақида хабардор қилди. Бу орқали у Конгресснинг урушни маъқуллаши борасидаги баҳсларга чек қўйишга уринди. Бу ҳақда Politico хабар берди.
Оқ уй бу қарорни махсус мактуб орқали тушунтирди. Politico нашри қўлга киритган ушбу ҳужжатда айтилишича, Яқин Шарқдаги урушга 60 кун тўлган АҚШ қонунларига кўра, агар қонун чиқарувчилар ҳарбий куч ишлатишга рухсат бермаса, операциялар шу муддатда тўхтатилиши шарт. Трампнинг таъкидлашича, Теҳрон билан тузилган оташкесим бу муддатнинг амал қилишини тўхтатади.
Ушбу мактуб Капитолийда кучайиб бораётган қаршиликларнинг олдини олишга қаратилган. Урушга икки ойга тўлган бўлса-да, ундан чиқиш стратегияси ҳали ҳам аниқ эмас. Шу сабабли Трамп республикачиларнинг қўллаб-қувватлашини йўқотиш хавфи остида турибди. Оқ уйнинг бу важлари демократлар ва айрим республикачиларга маъқул келмайди. Улар урушни якунлаши кераклигини айтмоқда.
“2026 йил 7 апрелдан бери АҚШ ва Эрон ўртасида ўт очиш содир бўлмади. 28 февралда бошланган ҳарбий ҳаракатлар якунланди”, деб ёзди Трамп ўз мактубида.
У бу билан ўт очишни тўхтатиш режими муддациз узайтирганини эслатиб ўтди. Мактуб тинчлик музокаралари тўхтаб қолган ва Эрон портлари ҳарбий блокада остида турган бир вақтда йўлланди.
Трамп 1 май куни Флорида штатига жўнаб кетиш олдидан журналистларга Эронга якуний таклиф берганини айтди. Бироқ бу мамлакатнинг “парчаланган” ҳукумати билан келишувга эришишга кўзи етмаётганини таъкидлади.
“Улар маълум қадамларни ташлади, лекин натижага эришишига ишончим комил эмас. Мен хурсанд эмасман, деб айта оламан. Улар келишувни истайди, лекин мен қониққаним йўқ”, деди президент.
1973 йилда қабул қилинган “Ҳарбий кучлар тўғрисидаги резолюция”га кўра, президент Конгрессни хабардор қилганидан кейин 60 кун ичида АҚШ кучлари можародан чиқиши керак. Фақат қонун чиқарувчилар ҳарбий ҳаракатларни давом эттириш учун овоз берсагина муддат узаяди. Оқ уй урушни якунлаш учун яна 30 кунлик қўшимча муддат сўраши мумкин.
Айни пайтда Трамп ўтмишдаги раҳбарлар ҳам 60 кунлик қоидага амал қилмаганини таъкидлади.
“Кўп президентлар бу муддатга амал қилмаган. Бошқа барча президентлар буни мутлақо конституцияга зид деб ҳисоблаган”, деди у.
Пентагон расмийлари эса, агар тинчлик музокаралари муваффақиятсизликка учраса, АҚШ кучлари Эронга ҳужумларни қайта бошлашга тайёрлигини билдирди.
Gerald R. Ford авиаташувчиси Яқин Шарқни тарк этди
АҚШнинг Gerald R. Ford авиаташувчи кемаси Эронга қарши операцияларда қатнашганидан сўнг Яқин Шарқни тарк этди. Ҳозирда минтақада АҚШнинг иккита авиаташувчиси — USS Abraham Lincoln ва USS George H.W. Bush қолди.
Форд кемаси 10 ойдан ортиқ вақт давомида денгизда бўлди. Кема Виржиния штатидан чиқиб, аввал АҚШнинг Европадаги қўмондонлиги ҳудудига, кейин эса наркотрафикка қарши кураш учун Лотин Америкасига йўл олган. Эрон билан кескинлик кучайганидан сўнг эса Яқин Шарққа юборилган эди.
