Эрон олий раҳнамосининг ҳарбий маслаҳатчиси Муҳсин Ризоий АҚШ учун Ҳормуз бўғозини “кемалар қабристони”га айлантиришдан огоҳлантирди. У бу ҳақда ўзининг X ижтимоий тармоғидаги саҳифасида маълум қилди.
Муҳсин Ризоий Эрон Ислом инқилоби қўриқчилари корпусининг собиқ қўмондони ҳисобланади.
“АҚШ — авиаташувчига эга дунёдаги ягона қароқчи давлатдир. Бизнинг қароқчиларга қарши курашиш қобилиятимиз ҳарбий кемаларни чўктириш имкониятларимиздан асло қолишмайди. Самолётингиз қолдиқлари Исфаҳонда қолганидек, кемаларингиз ва қўшинларингиз ҳам қабристонга тушишига тайёр туринг”, деди Ризоий.
2 май куни АҚШ президенти Дональд Трамп АҚШнинг Ҳормуз бўғозини қамал қилишини қароқчиликка қиёслаб, буни “жуда даромадли иш” деб атади.
“Биз кемани қўлга олдик, юк ва, нефтни қўлга олдик. Бу жуда даромадли бизнес. Биз худди қароқчиларга ўхшаймиз”, деди у.
Эроннинг урушни тугатиш шартлари
Ўтган ҳафта Эрон ҳукумати АҚШга урушни якунлаш бўйича асосий шартлар баён этилган 14 банддан иборат тинчлик режасини тақдим этди. Режада АҚШдан келгусида ҳужум қилмаслик бўйича кафолат бериш, Америка қўшинларини чегара ҳудудларидан тўлиқ олиб чиқиш, ҳарбий-денгиз блокадасини бекор қилиш, музлатилган Эрон активларини қайтариш, санкцияларни олиб ташлаш талаб этилган.
Шунингдек, Эрон етказилган зарар учун товон тўлаш, минтақадаги ҳарбий ҳаракатларни, жумладан, Исроилнинг Ливанга ҳужумларини тўхтатишни ва “Ҳормуз бўғози фаолиятининг янги механизми”ни жорий этишни илгари сурган. АҚШ президенти Дональд Трамп режани кўриб чиқиши, аммо уни қабул қилиши даргумонлигини айтган.
Эрон Ҳормуз блокадаси туфайли қанча зарар кўрди?
АҚШнинг денгиз блокадаси туфайли Эрон қарийб 5 миллиард долларлик нефть даромадидан маҳрум бўлди. 13 апрелдан бери АҚШ ҳарбийлари нефть ва бошқа “контрабанда юклари” билан блокадани бузиб ўтишга уринган 40 дан ортиқ кеманинг йўналишини ўзгартирган. Жами 53 миллион баррел Эрон нефти ортилган 31 та танкер Форс кўрфазида қолиб кетган, уларнинг қиймати камида 4,8 миллиард долларга баҳоланган. Шунингдек, иккита кема АҚШ томонидан қўлга олинган.
