Ўзбекистонга расмий ташриф билан келган Чехия бош вазири Андрей Бабиш журналистларга берган интервьюсида мамлакат ҳақида фикр билдириб, Шавкат Мирзиёевни буюк етакчи деб атади.
“Сизнинг президентингиз буюк етакчи, у киши билан шунча кўп вақт ўтказганимдан жуда мамнунман”, деган Андрей Бабиш.
У Ўзбекистонда Чехия делегацияси жуда яхши қарши олинганини, Ўзбекистон қанчалик ривожлангани, мамлакатнинг бойлиги, одамлари, айниқса ёшлар нақадар билимли эканлиги ҳайратда қолдирганини айтди.
Шунингдек, Ислом цивилизацияси марказига ташрифи таассуротлари билан бўлишиб, марказни марказни “фантастик” дея таърифлади.
У, шунингдек, Ўзбекистон иқтисодий салоҳияти ва имкониятларини юқори баҳолаб, мамлакатга аввалроқ келмаганидан афсусда эканини билдирди. Андрей Бабиш Skoda компанияси томонидан Ўзбекистонга 10 та поезд етказиб бериш бўйича шартнома имзоланганини ҳам алоҳида олқишлади.
Чехия бош вазири Андрей Бабиш расмий ташриф билан Ўзбекистонга 29 апрель куни келганди. Шу куни Тошкентда Ўзбекистон-Чехия бизнес-форуми бўлиб ўтди. Чехия компаниялари саноат ва транспорт соҳаларига инновацияларни жорий этишга тайёр эканликларини билдириб, Ўзбекистонни Марказий Осиё бозорига чиқиш учун стратегик марказ сифатида эътироф этди. Учрашув якунида машинасозлик, инфратузилмани модернизация қилиш ва таълим йўналишларида ҳамкорлик бўйича ҳужжатлар имзоланди.
30 апрель куни Кўксарой қароргоҳида Чехия бош вазири расмий кутиб олиш маросими ўтказилди. Сўнг Шавкат Мирзиёев ва Чехия бош вазири Андрей Бабишнинг тор доирада ва икки мамлакат делегациялари иштирокида музокаралари бўлиб ўтди. Унинг якунида икки томонлама ҳужжатлар тўплами имзоланди.
