Тошкент шаҳар Ички ишлар бош бошқармаси ижтимоий тармоқларда тарқалган, Олмазор тумани ИИБ амалдорининг топшириғи акс этган видео юзасидан расмий муносабат билдирди.
Қайд этилишича, пойтахтда дайдилик ва тиланчилик ҳолатларига қарши тизимли ишлар олиб борилмоқда. Сўнгги уч ой давомида шаҳарда 283 нафар дайди ва 210 нафар тиланчилик билан шуғулланган шахс аниқланиб, уларга нисбатан қонуний чоралар кўрилган.
Шу билан бирга, ИИББ мазкур йўналишда ходимларга бирор режа ёки мажбурий кўрсаткич юклатилмаганини маълум қилди. Уларнинг асосий вазифаси жамоат тартибини бузаётган шахсларни аниқлашдан иборат экани таъкидланди.
Идора маълумотига кўра, кўчада учраётган дайдилик ва тиланчилик ҳолатларининг бир қисми аслида эҳтиёж эмас, балки атайлаб ташкил этилган фирибгарлик фаолияти бўлиши мумкин. Хусусан, болалардан фойдаланиш ёки сохта ногиронлик орқали фуқароларда раҳм уйғотиш ҳолатлари жиддий муаммо сифатида қайд этилган.
Шунингдек, Олмазор тумани ИИБ Ички ишлар органлари фаолиятини мувофиқлаштириш бошқармаси Ҳуқуқбузарликлар профилактикаси бўлими бошлиғи Аброр Худойбердиевнинг хатти-ҳаракатлари юзасидан хизмат текшируви олиб борилаётгани билдирилди. Аввалроқ ижтимоий тармоқларда ушбу амалдор профилактика инспекторларига “дайди топиш” бўйича кескин топшириқ бергани акс этган аудио ва видео тарқалганди.
