Тошкентнинг Яшнобод туманида 30 март куни Malibu ҳайдовчиси ППХ ходимига мушт туширганди. Унинг Сирдарё вилояти Ички ишлар бошқармасида масъул лавозимида ишлаган акаси 3 апрель куни ишдан олинди.
Ички ишлар вазири ўринбосари, полковник Диёрбек Саттаров раҳбарлигида вилоят бошқармасида ўтган йиғилишда тизимдаги камчиликлар, жумладан, айрим ходимларнинг хизмат вазифаларига лоқайд ёндашуви, профилактика ишлари самарадорлиги пастлиги ва жиноятчиликка қарши курашда тизимли ёндашув етишмаслиги кескин танқид қилинди.
Хусусан, жамоатчилик эътирозига сабаб бўлган ҳолат — ППХ ходимига қўл кўтарган ҳайдовчига алоқадор шахс, яъни унинг ички ишлар тизимида ишловчи акасининг воқеага аралашишга урингани алоҳида кўриб чиқилди. Ушбу ҳолат хизмат ваколатларидан нотўғри фойдаланиш эҳтимоли сифатида баҳоланди.
Йиғилишда подполковник Шерзод Пардаев хизмат интизомини бузганлиги учун лавозимидан озод этилгани билдирилди. Шу билан бирга, мансабидан қатъи назар, қонунийлик ва хизмат интизомини бузган ҳар қандай ходимга нисбатан қатъий чоралар кўрилиши давом эттирилиши таъкидланди.
Ҳозирда қонунбузар процессуал тартибда ушланиб, унга нисбатан Яшнобод тумани прокуратураси томонидан Жиноят кодексининг 219-моддаси 2-қисми, ҳокимият вакилига қаршилик кўрсатиш, 277-моддаси (безорилик)3-қисми “г” банди, безорилик ҳаракатларининг олдини олиш чорасини кўрган ходимга қаршилик кўрсатиш билан жиноят иши қўзғатилган.
