Toshkentda mast holatda avtomashina boshqarib, yoʻl-transport hodisasi sodir etgan, PPX xodimiga qoʻl koʻtargan haydovchiga nisbatan jinoyat ishi qoʻzgʻatildi. Bu haqda YHXX xabar berdi.
Ma’lum qilinishicha, 30-mart kuni tungi vaqtda Yashnobod tumani koʻchalarining birida Malibu va Leapmotor avtomashinalari ishtirokida toʻqnashuv sodir boʻlgan. Haydovchilar oʻrtasida tortishuv yuzaga kelgani uchun Leapmotor haydovchisi 102 raqamiga qoʻngʻiroq qilib, davlat raqam belgisiga ega boʻlmagan Malibu haydovchisi avariya sodir etib, unga nisbatan qoʻpollik qilayotganini bildirgan.
Murojaatga asosan tezkorlik bilan voqea joyiga yetib borgan yoʻl patrul xizmati xodimlari holatni rasmiylashtirish chogʻida mast holatda mashina boshqarib kelgan Malibu haydovchisiga alkotester moslamasi orqali tekshiruvdan oʻtishni taklif qilingan. Xodimlarning qonuniy talabiga boʻysunmagan mast haydovchi ularga faol qarshilik koʻrsatib, PPX xodimidan biriga musht ham tushirgan. Holat aks etgan video ijtimoiy tarmoqlarda ham tarqaldi.
Ushbu haydovchi boshqa xodimlar hayoti, sogʻligʻiga zarar yetkazishning oldini olish maqsadida maxsus vositalardan foydalanib, zararsizlantirilgan.
“Leapmotor avtomashinasini turtib oldim. Toʻxtab, nima boʻldi ekan, deganimda kayfligim sababli u bilan gʻijillashganimda 102 ga qoʻngʻiroq qilib, ‘GAIʼlarni chaqirgandi. Shu bilan birga PPX xodimlari ham kelgandi. Ichganligim sababli qoʻlim koʻtarilib ketdi. Mingdan ming pushaymonman qilgan ishimdan. Ichki ishlar xodimlaridan uzr soʻrayman. Bu hol boshqa takrorlanmaydi”, degan aybdor haydovchi.
