АҚШ ва Исроилнинг Эронга қарши уруши яқин 2-3 ҳафта ичида тугаши мумкин. Бу ҳақда президенти Дональд Трамп 1 апрель куни Оқ уйда журналистлар билан суҳбатда маълум қилди.
Унинг сўзларига кўра, Эронга ҳужумлар мамлакат раҳбарияти билан келишув тузилмаган тақдирда ҳам тўхтатилади.
“Уларда режим ўзгарди. Бу менинг режамда йўқ эди. Менинг битта мақсадим бор эди — уларда ядро қуроли пайдо бўлишининг олдини олиш ва бу мақсадга эришилди... Биз ишни тугатяпмиз ва бу икки ҳафта, эҳтимол, яна бир неча кун давом этади. Уларда бор бўлган ҳамма нарсани йўқ қилмоқчимиз”, деди Трамп.
АҚШ президенти келишувга эришилгач, уруш эртароқ тугаши мумкинлигини тан олди, у Эрон ҳукумати буни “жуда хоҳлаётгани”ни айтди. Бироқ, Трамп келишувга эришиш ёки эришмаслик факти “фарқланмаслиги”ни таʻкидлади
Трамп: Ҳормуз бўғози блокадасининг бизга алоқаси йўқ
АҚШ президентининг сўзларига кўра, Америка ва Исроил ҳужумлари бошланганидан кейин Эрон томонидан Ҳормузнинг Европа кемалари учун ёпилиши АҚШнинг муаммоси ҳисобланмайди.
“Агар Франция ёки бошқа бирор давлат газ ёки нефть олишни истаса, улар Ҳормуз бўғозидан ўтиб, ўзларига ғамхўрлик қилиши мумкин. Бўғозда содир бўлаётган воқеаларнинг бизга алоқаси йўқ”, деди у.
АҚШ президенти Яқин Шарқда уруш ва Ҳормуз бўғози блокадаси туфайли нефть нархи 50 фоизга кескин ошишига изоҳ берди. Трампнинг фикрича, АҚШ “тез орада” Эронга ҳужумларни тўхтатиши билан “нархлар кескин тушиб кетади”.
Трампнинг бу баёнотлари унинг аввалги таҳдид ва огоҳлантиришларига зид. Хусусан, АҚШ президенти Ҳормуз бўғозини очишни талаб қилиб келаётганди. Ҳатто бунинг учун қуруқликдаги қўшинларни жалб этиш эҳтимолини ҳам инкор этмаган.
Шунингдек, у Эрон бўғозни очмаса, мамлакатнинг энергетика объектларига зарба берилишини таъкидлаган эди. Кейинчалик эса Теҳрон билан музокаралар фонида бу зарбаларни 6 апрелгача қолдирди. Мутахассислар Трамп май ўрталарида Хитой раиси Си Цзиньпин билан учрашиши кутилаётгани ва уруш шу муддатга қадар якунланиши мумкинлигини айтмоқда
