Эрон Ҳормуз бўғозини очиш учун АҚШга шартлар қўйди. Эрон парламенти раиси Муҳаммад Бағир Ғолибаф мазкур шартларни очиқлади.
“Тўлиқ ўт очишни тўхтатиш амал қилиши учун денгиз блокадаси бузилмаслиги, жаҳон иқтисодиёти гаровга олинмаслиги ва сионистларнинг барча фронтларда урушни авж олдириши тўхтатилиши керак. Сулҳ бузилган вазиятда, Ҳормуз бўғозини очиб бўлмайди. Ягона йўл — Эрон миллатининг ҳуқуқларини тан олиш”, деб ёзди Ғолибаф X ижтимоий тармоғида.
Эрон Ҳормуз бўғозини 17 апрель куни очган бўлса-да, эртаси куни уни қайта ёпди. Бунга АҚШ президенти Дональд Трампнинг Эронга қарши денгиз блокадаси бекор қилинмагани сабаб бўлди.
АҚШ ва Эрон музокаралари
Томонлар ўртасидаги музокараларнинг биринчи босқичи 11-12 апрель кунлари Исломободда бўлиб ўтди, бироқ у ҳеч қандай натижасиз якунланди. АҚШ Ҳормузни блокада қилишни бошлади ва бўғоздан ўтадиган кемалар Эронга тўлов қилса, таъқиб қилинишидан огоҳлантирди.
АҚШ 19 апрель куни Уммон кўрфазида сузаётган Эрон кемасини ўққа тутиб, қўлга олди. Кема Эроннинг Бандар-Аббос порти томон йўл олаётганди. Бунга жавобан Эрон АҚШнинг ҳарбий кемаларига ҳужум қилганини таъкидлади.
Томонлар ўртасида келишилган икки ҳафталик сулҳ 21 апрелда тугаса-да, Трамп охирги муддат 22 апрель оқшоми эканини маълум қилди. Аммо АҚШ президенти сулҳ тугаган куни Покистон илтимосига кўра уни узайтирганини, Эрондан тинчлик музокаралари учун таклифлар кутаётганини маълум қилди.
