Франциянинг “Страсбург” клубига тегишли бўлган ва ҳозирда ижара асосида Саудия Арабистонининг “Неом” жамоасида тўп сураётган Райан Месси Европа грандлари эътиборига тушди. 18 ёшли вингернинг хизматларига “Барселона”, “Бавария” ва “ПСЖ” каби клублар жиддий қизиқиш билдирмоқда.
Бироқ бу трансферга “Челси” тўсқинлик қилиши мумкин. Гап шундаки, “Страсбург” ва “Челси” клублари битта хўжайинга тегишли. Шу сабабли, Лондон клуби иқтидорли футболчини ўз лойиҳасининг муҳим қисми деб ҳисобламоқда ва уни бошқа жамоага ўтмаслиги учун трансфер жараёнини тезлаштиришни режалаштирган.
Маълумот учун, жорий мавсум Райан Месси барча турнирлар доирасида жами 22 та ўйинда майдонга тушиб, ўз ҳисобига 3 та гол ва битта голли узатма ёздириб қўйган. У 2026-йилнинг ёзига қадар “Неом” сафида тўп тепади. Шундан кейин Францияга қайтиши кутилмоқда. Унинг “Страсбург” билан амалдаги шартномаси 2030-йилнинг ёзига қадар мўлжалланган. Transfermarkt портали вингернинг қийматини 1 миллион еврога баҳоламоқда.
