Польшалик ҳужумчи Роберт Левандовски мавсум якунида “Барселона”ни тарк этиши мумкин. The Guardian нашрининг ёзишича, каталонияликлар унинг ўрнига Мюнхеннинг “Бавария” клуби футболчиси Ҳарри Кейнни олиб келмоқчи.
Манбага кўра, инглиз ҳужумчиси “кўк-анорранглилар” ҳужум чизиғини кучайтириш учун асосий номзод бўлиб турибди. 32 ёшли футболчининг шартномасида 2026-йилнинг ёзида исталган клуб Кейнни 65 миллион евро эвазига сотиб олиши мумкинлиги кўзда тутилган. Бироқ бу банд фақат битта шарт бажарилгандагина кучга киради. Кейн клуб раҳбариятини қишки трансфер ойнаси якунигача жамоани тарк этмоқчи экани ҳақида расмий равишда огоҳлантириши керак бўлади. “Барселона” эса ушбу бандни фаоллаштирган ҳолда футболчини ўз сафига қўшиб олишни мақсад қилган.
Футболчининг ўзи келажаги бўйича бир қарорга келмаган. Аммо у ўзини Испания Ла Лигасида синаб кўриш мақсадида “Барселона” таклифини қабул қилиши мумкинлиги тахмин қилинмоқда.
Маълумот учун, Ҳарри Кейн 2023-йилда “Тоттенҳэм”дан “Бавария”га ўтган. 32 ёшли ҳужумчи жорий мавсум “немис машинаси” сафида жами 17 ўйинда майдонга тушиб, 23 та гол ва 3 та голли узатма муаллифига айланган. Ҳужумчининг “Бавария” билан амалдаги шартномаси 2027-йилнинг ўрталаригача мўлжалланган.
