Франциянинг “ПСЖ” клуби “Атлетико Мадрид” ҳужумчиси Хулиан Алваресни ўз сафига қўшиб олиш имкониятни кўриб чиқмоқда. Парижликлар бош мураббийи Луис Энрике 25 ёшли аргентиналик футболчини жамоа ҳужум чизиғини кучайтириш учун идеал номзод сифатида кўрмоқда. Бу ҳақда Sky Sport Switzerland нашри хабар берди.
Унга кўра, клуб раҳбарияти бир неча ҳафтадан бери Алвареснинг трансфер имконияти ҳамда эҳтимолий келишув тафсилотларини ўрганиб чиқмоқда. Хабар қилинишича, футболчининг ўзи ҳам Энрике қўл остида ўйнаш фикрига ижобий муносабат билдирган.
Хулиан Алваресга Англия Премьер Лигаси клубларидан бир нечтаси ҳам қизиқиш билдираётганига қарамай, аргентиналик форвард Англияга қайтиш вариантини кўриб чиқмаётгани айтилмоқда. Агар клублар келишувга эришса, Алвареснинг “ПСЖ”га ўтиш эҳтимоли жуда юқори. Шунингдек, “Барселона” ҳам аргентиналик футболчининг атрофидаги вазиятни ўрганиб чиқмоқда.
“Атлетико” ҳужумчини сотишга тайёр, бироқ мадридликлар Хулиан учун 120 миллион евро миқдорида товон пули белгилаган. Мазкур сумма тўлиқ тўланса, клуб музокараларга киришишга рози.
Маълумот учун, жорий мавсум Хулиан Алварес “матрасчилар” сафида жами 15 та ўйинда майдонга тушиб, 9 та гол ва 4 та голли узатма муаллифига айланган. Футболчининг Мадрид клуби билан шартномаси 2030-йилнинг ёзига қадар амал қилади. Transfermarkt портали ҳужумчининг қийматини 100 миллион еврога баҳолаган.
