Қорақалпоғистонда Яқин Шарқдаги ватандошларга ёрдам кўрсатувчи штаб ташкил этилди. Бу ҳақда Жўқорғи Кенгес хабар қилди.
Қайд этилишича, ушбу штаб Яқин Шарқ мамлакатларида юз бераётган нохуш ҳолатлар сабабли хорижда бўлиб турган ҳамда ватанга қайтишда муаммоларга дуч келаётган фуқароларга амалий ёрдам кўрсатиш мақсадида Қорақалпоғистон Республикаси Вазирлар Кенгаши ва Қорақалпоғистон Республикаси Ички ишлар вазирлиги ҳамкорлигида ташкил этилган бўлиб, 24/7 режимида фаолият юритади.
Муаммога дуч келган фуқаролар штабнинг (61) 222-27-27 телефон рақами ҳамда @nukusshtab Telegram манзили орқали мурожаат қилиши мумкин.
АҚШ ва Исроил Эронга ҳужум қилиши ортидан Яқин Шарқда кузатилаётган уруш туфайли ҳаво маконидан фойдаланиш бўйича жорий этилган вақтинчалик чекловлар сабабли қатор авиақатновлар бекор қилинган. Шу боис Ўзбекистон Ташқи ишлар вазирлиги фуқароларга Яқин Шарқдаги давлатларга сафар уюштирмасликни тавсия қилган.
Умрага кетган Ўзбекистон фуқароларини қайтариш мақсадида 2 мартдан бошлаб Uzbekistan Airways репатриация рейслари ташкил этилади.
