Ўзбекистон резиденти Шавкат Мирзиёев 17 февраль куни рафиқаси ҳамроҳлигида АҚШга етиб борди.
“Эндрюс” авиабазасида давлат раҳбарини АҚШ-Ўзбекистон савдо палатаси раиси Керолин Лемм, Миссисипи штати Миллий гвардияси бирлашган штаби қўмондони Жеймс Хенкинс, Вашингтонда ажратилган қароргоҳда эса АҚШ президентининг махсус вакили Паоло Замполли кутиб олди.
АҚШга ташриф доирасида Шавкат Мирзиёев Тинчлик кенгашининг биринчи саммити ва бир қатор ишбилармонлик тадбирларида иштирок этади.
Тинчлик кенгаши — Дональд Трамп томонидан илгари сурилган халқаро ташкилотдир. Швейцариянинг Давос шаҳрида 2026-йилнинг 22 январь куни ташкилот низоми қабул қилинган. Шавкат Мирзиёев ҳам Трамп билан Тинчлик кенгаши битимини имзолаган.
Кенгашнинг биринчи саммити АҚШ Тинчлик институтида бўлиб ўтади ҳамда Ғазо секторини тиклаш, унга гуманитар ёрдам кўрсатиш, ушбу минтақада тинчлик ва барқарорликни таъминлаш масалаларига бағишланади. Саммитда Тинчлик кенгашининг биринчи расмий учрашуви ва бир вақтнинг ўзида халқаро донорлик конференцияси бўлади.
Ўзбекистон етакчиси ташрифнинг ишбилармонлик дастури доирасида Американинг етакчи компаниялари ва молия институтлари раҳбарлари иштирокидаги стратегик лойиҳалар тақдимоти ҳамда иқтисодий соҳага оид икки томонлама ҳужжатларни имзолаш маросимида иштирок этиши кўзда тутилган.
